La historiadora del arte yá foi coordinadora de dellos proyectos nel propiu centru ente 2013 y 2015
30 jul 2025 . Actualizado a las 12:03 h.La Fundación La Llaboral, Centru d'Arte, Creación Industrial y Promoción Cultural nomó nueva directora xerente a la historiadora y directora artística Semíramis González. La conseyera de Cultura, Política Llingüística y Deporte y presidenta del organismu, Vanessa Gutiérrez, encabezó güei la xunta del patronatu na que s'aprobó esta decisión. Nel rigorosu procesu d'evaluación que se llevó a cabu mientres los últimos meses, coordináu pola comisión de selección, González foi la candidata meyor valorada. El patronatu ratificó l'alcuerdu esta mañana.
Como establecíen les bases pa la elección del xuráu, la comisión científica de Llaboral propunxo a trés integrantes: María Castellanos, Jorge Fernández León y Roberta Bosco. A propuesta d'esta comisión, y en calidá d'esperta n'arte y xestión cultural, designóse tamién a Concha Jerez. La composición del tribunal completóse con dos miembros del patronatu: la conceyala de Cultura del Conceyu de Xixón, Montserrat López, y el director xeneral de Patrimoniu Cultural, Pablo León.
El procedimientu selectivu constó de trés fases: valoración de méritos, presentación del proyectu de dirección y una entrevista. Esta estructura garantizó una evaluación rigorosa y oxetiva de les candidatures y asegura que la persona escoyida cumple colos estándares de competencia y visión estratéxica pa dirixir l'organismu.
Semíramis González ye llicenciada n'Hestoria del Arte pola Universidá d'Uviéu y cunta con un máster n'Hestoria del Arte Contemporaneu y Cultura Visual pol Muséu Nacional Centru d'Arte Reina Sofía y la Universidá Complutense de Madrid. Atesora una dilatada trayectoria nel ámbitu de la xestión cultural y la dirección de proyectos artísticos. Asina, de 2018 a 2022 foi la directora artística de la feria internacional d'arte contemporaneu Justmad, de Madrid, y de 2019 a 2022 exerció como directora artística de la feria internacional d'arte contemporaneu Justlx de Lisboa. Ente 2022 y 2023 foi directora artística de l'Agenda Cultural del Institutu de les Muyeres y dende 2024 desempeñaba'l puestu de directora de conteníos del programa Cultura Orgullosa, venceyáu al Ministeriu d'Igualdá.
Coles mesmes, foi coordinadora de diversos proyectos artísticos pa instituciones como Es Baluard Muséu Contemporani de Palma o'l mesmu Llaboral Centru d'Arte y Creación Industrial ente 2013 y 2015. Igualmente, tien una amplia esperiencia como comisaria de proyectos y destaca la so trayectoria de docencia en distintos másteres y títulos propios de diverses instituciones educatives.