VerAsturies impulsa'l turismu rural y auténticu na 68ª FIDMA con dos stands dedicaos a 21 conceyos
AGORA
A lo llargo de la Feria va haber actos de los conceyos amosando los sos atractivos
31 jul 2025 . Actualizado a las 17:13 h.Nel marcu de la 68ª Edición de la Feria Internacional de Muestres d'Asturies (FIDMA), la marca VerAsturies refuerza'l so compromisu col desenvolvimientu del turismu local per aciu la instalación de dos stands promocionales dedicaos a 21 conceyos asturianos que representen la diversidá natural, cultural y paisaxística d'Asturies.
Col lema «Conceyos con encantu», estos espacios van ufiertar a los visitantes una esperiencia inmersiva p’afayar rincones con identidá propia, dende la mariña oriental hasta'l corazón del occidente interior. Los conceyos protagonistes son: Llanes, Cabrales, El Franco, Salas, Villayón, Nava, Ponga, Noreña, Samartín d'Ozcos, Vilanova d'Ozcos, San Tiso d'Abres, Santalla d'Ozcos, Taramundi, Castropol, A Veiga, Grau, Proaza, Candamu, La Ribera, Quirós y Teberga.
Cada stand va acoyer materiales turísticos, proyecciones audiovisuales y actividaes interactivas que van dexar conocer la ufierta en senderismu, gastronomía, patrimoniu etnográficu, tradiciones y agospiamientos rurales. Amás, los visitantes van poder participar en sorteos, talleres y degustaciones entamaes por representantes de los conceyos presentes.
Con esta acción, VerAsturies busca asitiar a estos conceyos como destinos turísticos de calidá, sostenibles y diferenciaos, apelando al viaxeru que busca autenticidá, naturaleza y conexón colo rural.
La Feria de Muestres, que se celebra en Xixón del 3 al 18 d'agostu, constitúi una plataforma clave pa dinamizar la economía local y dar visibilidá a proyectos colaborativos como esti, que promueven un modelu turísticu más inclusivu y descentralizáu.