L'asociación entama una campaña pa captar nueves persones asociaes na que se va regalar un llibru
04 ago 2025 . Actualizado a las 16:35 h.Iniciativa pol Asturianu sigue reivindicando l'asturianu na Feria Internacional de Muestres de Xixón d’esti añu 2025. Esti añu la organización de reivindicación llingüística va tener una participación destacada na Feria Internarcional de Muestres d’Asturies 2025 pol incrementu d’empreses qu’acompañen a la ONG nesta edición del eventu.
Dende l’añu 2017 la llingua asturiana ta presente con un espaciu propiu na feria comercial llogrando visibilizar a les diferentes marques qu’usen l’asturianu na so actividá comercial. Depués de siete años de presencia, nestos ocho años, l’espaciu d’Iniciativa pol Asturianu consolidáse como un llugar pa la reivindicación y pal reconocimientu a los profesionales qu’usen l’asturianu.
Les firmes que van tar presentes nel espaciu son de diferentes sectores como la moda, l’agroalimentariu, industrial, audivisual, artesanía, editorial, infantil… Ente elles figuren Acuto Xuegos, Al Otru Andar, Arte Yunastur, Asociación d'Escritores d'Asturies, Díes Adulces, Cartonaxes VIR, Chigre La Tortuga, Círculo Xixón Noega Baloncestu, Cuatro Gotes Producciones, Ediciones Radagast, Ediciones Trabe, Cerveza Caleya, La Fabriquina, La Semeya Editorial, Nordés Móvil Telefonía, Panduru, Pintar-Pintar, Puru Remangu, Quesería Ca Sanchu, Ringo Rango, Tiza y Peonza.
Al traviés d’esta presencia, l’asociación pretende facer llegar a los visitantes de la Feria de Muestres que l’asturianu ye un elementu que favorez la creación d’empreses y que xenera actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses. La presidenta del colectivu recordó na inauguración del espaciu que «esta ye la evidencia de que l’asturianu ta más vivu que nunca y que ta llogrando una prestixu social que tamién redunda nel ámbitu empresarial. Esti añu llogramos sumar más empreses visibilando la riqueza que xenera l’idioma».
Amás de la propia presencia na FIDMA, el colectivu programó actividaes pa tolos díes del eventu como presentaciones de llibros, recitales tasties, firmes d’escritores, presentaciones de les empreses y d’otres entidaes como l’agrupación d’Empresarios y Profesionales pol Asturianu (EPA) o l’asociación Faciendo Camín.
Asinamesmo, la Feria de Muestres va acoyer una nueva xornada dedicada al idioma el prósimu sábadu 16 d’agostu. Esti IV Día de la Llingua Asturiana va tener un valor adicional esti añu pol actu d’homenaxe al escritor Xuan Bello recientemente fallecíu. Pa reconocer el so llabor lliterariu, la asociación va entamar una llectura a micrófonu abiertu y llibre a tola ciudadanía de la obra ‘Hestoria universal de Paniceiros’. El miércoles 6 d’agostu va presentáse nel propiu stand d’Iniciativa pol Asturianu tola programación pa esti día asina como’l cartelu.
Campaña pa captar persones asociaes
«Asóciate y lleva un llibru» ye’l nome de la campaña que la organización de reivindicación llingüística plantega pa esta edición de la feria comercial. Toles persones que s’inscriban como altes nueves como asociaos d’Iniciativa pol Asturianu van llevar de regalu un Diccionariu d’asturianu. Con esta iniciativa la organización quier premiar con esta obra a les persones que se sumen a la ONG y medrar en númberu d’implicaos nel trabayu colectivu pola llingua asturiana.
Iniciativa pol Asturianu, que nun recibe nengún tipu d’ayuda pública, quier qu’esti puestu seya un llugar d’alcuentru y un escaparate a la sociedá asturiana de la importancia que tien l’asturianu na economía asturiana. L’espaciu alcuéntrase nel pabellón 3-4 del Palaciu de Congresos nel stand 14.