Son 91 les families qu'acueyen a neños y neñes del campamentu de refuxaos de Tinduf
06 ago 2025 . Actualizado a las 10:41 h.97 menores saharagüis participen esti branu nel programa Vacaciones en paz, una iniciativa que dexa a neños y neñes de 8 a 12 años, procedentes de los campamentos de refuxaos de Tinduf (Arxelia), esfrutar d'una estancia temporal n'Asturies mientres los meses de xunetu y agostu. «Asturies va siguir siendo una comunidá comprometida cola cooperación internacional. Frente a los retayos internacionales, reafitamos el nuesu sofitu infrayable al pueblu saharagüi», sorrayó la conseyera Marta del Arco na so bienllegada.
Los menores saharagüis que participen nesta edición superen en casi una ventena a los del añu pasáu. Mientres la so estancia n'Asturies, neños y neñes van poder beneficiase de revisiones médiques, ameyorar la so nutrición, aprender español y evitar les estremes temperatures del desiertu, qu'algamen los 55 graos pel branu. Amás, la esperiencia fomenta l'intercambiu cultural y la creación de venceyos duraderos ente families asturianes y saharagüis.
Marta del Arco aprovechó l'actu pa repitir el compromisu del Gobiernu asturianu col pueblu saharagüi, una collaboración que dura yá más de dos décades y que se materializa en proyectos d'ayuda alimentaria, atención sanitaria, formación pa persones con discapacidá, rehabilitación d'infraestructures educatives y culturales, y construcción de viviendes pa víctimes de mines antipersona. «La crisis humanitaria saharagüi dura yá 50 años. Hai xeneraciones que nun conocen otra vida fuera de les dures condiciones del desiertu. Esti programa dexa conocer otres formes de vida y convivir con otres cultures qu'arriquecen tanto a los menores como a les families d'acoyida», sorrayó la conseyera.