L'eventu astronómicu va producise na tarde del 12 d'agostu del añu viniente
12 ago 2025 . Actualizado a las 16:45 h.Asturies dio güei el pistoletazu de salida a los preparativos pal eclipse total que se va producir el 12 d'agostu de 2026, unu de los eventos astronómicos más relevantes del sieglu.Trátase d'un fenómenu estraordinariu, yá que l'estáu español va ser l'únicu país habitáu nel que podrá vese na so totalidá. Asturies ta nuna posición privilexada: n'Uviéu, por casu, calcúlase que l'eclipse va durar un minutu y 48 segundos, el máximu en tol territoriu.
Estos fenómenos atraen a miles de persones, polo que'l Principáu prepara un programa d'actividaes en collaboración cola Delegación del Gobiernu, la Federación Asturiana de Conceyos y espertos n'astronomía. Ente les iniciatives previstes destaca la ellaboración d'un mapa de puntos d'observación seguros, distribuyíos per tol territoriu, que van garantizar servicios afayadizos, van evitar aglomeraciones y van facilitar la movilidá.
La salú ocular va ser una prioridá, yá que ver l'eclipse ensin protección afayadiza puede causar daños graves na vista. Por esta razón, van desenvolvese campañes educatives en centros escolares, con talleres y materiales específicos a lo llargo del cursu.
La divulgación científica y el turismu astronómicu van ser tamién exes fundamentales del programa. Asina, va cuntar cola collaboración d'entidaes rexonales como'l proyectu Allande Stars, que la so directora, Lucía González, esplicó güei les claves pa esfrutar del eclipse de forma segura y dalguna de les actividaes que van averar l'eventu a la ciudadanía.