L'Asociación Alameda programa cinco actuaciones, onde cuatro son asturianes y una d'Escocia
13 ago 2025 . Actualizado a las 13:35 h.El gran clásicu de la música folk n'Asturies, la Noite Celta de Porcía, ta acabante d'espublizar nes sos redes sociales el cartel de la que va ser la so 41ª edición. Va ser el 30 d'agostu dende les 21:00 hores y nel mesmu llugar de siempre, nel Campu de l'Alameda, onde van xubise al escenariu hasta cinco artistes, onde cuatro son asturianes y una de les bandes vien dende Escocia.
Los y les artistes que van pasar per Porcía l'últimu sábadu d'agostu son El Cabazo, Ca Beleño, Corquiéu, Rura y La Güeriata DJ. Destaca sobre manera la presencia de Beleño y Corquiéu, esti últimu pol parón que fixo xustamente dende l'andanciu de Covid-19 y que vuelve agora con integrantes nueves na banda. Pela so parte, Ca Beleño, el grupu que repasa los cantares del primer discu de la hestórica banda, toca en Porcía tres presentar la formación orixinal na viéspora de la Noite del añu pasáu el so últimu trabayu, Daón.
Rura pasa per Porcía cola vuelta a la so producción musical, tres asoleyar en xunetu d'esti añu un cenciellu tituláu The Great Herdsman of Etive. La banda multipremiada y una de les más solicitaes de folk escocesa, con cinco álbumes aclamaos, fadrá les delicies del públicu. La so esquisita y refinada combinación de violín, gaites de les Highlands, xiblata, bodhrán y guitarra conquista a aquelles persones que sienten la música d'una banda que cumple yá 15 años sobre l'escenariu.
Les actividaes rellacionaes cola Noite Celta de Porcía nun van faltar tampoco na viéspora. Na carpa d'El Fornello, dende les 20:30 hores, va haber mesa redonda, espicha y jam session. Porcía espera yá por una de les nueches más máxiques del añu.