El concursu busca los meyores quesos tradicionales y singulares del norte peninsular
13 ago 2025 . Actualizado a las 12:09 h.Los Premios ARNIU nacen cola vocación d'aumentar la visibilidá de los quesos artesanales y singulares del norte peninsular, mesmo que poner en valor l'oficiu de los ganaderos y ganaderes y/o ellaboradores de quesos artesanos, reconociendo la so esperiencia, oficiu y saber facer, entendiendo qu'esti trabayu va intrínsecamente venceyáu a la contorna natural onde se desenvuelve.
Nesta primer edición, almitiéronse participantes de Galicia, Llión, Cantabria, Euskal Herria y Asturies, y se han presentando un total de 60 quesos. Los Premios ARNIU cunten col patrociniu oficial de la marca de calidá Alimentos del Paraísu y Caxa Rural d'Asturies.
Los quesos yá fueron evaluaos pol xuráu que destacó la peralta calidá de los quesos presentaos. La deliberación del xuráu conoceráse'l próximu xueves mientres la gala d'entrega de los Premios Arniu, nel Centru Social La Caballería de Soto Ribera, y van apurrise los Arnios d’Oru, Plata y Bronce en cada categoría. Amás, contempláronse otros galardones como'l de Meyor Quesu de los Premios Arniu o Arniu de Platín, asina como los premios especiales al meyor quesu de lleche ecolóxico, el meyor quesu de lleche crudo y el meyor quesu de la marca Alimentos del Paraísu.
Enantes de la entrega de premios, el xueves 14 a les 10:00 hores, va tener llugar el seminariu ‘Protoquesos. El Camín escontra la recuperación de los quesos primitivos d’Asturies’, un alcuentru divulgativu que va afrontar la hestoria y les técniques d'ellaboración de dellos quesos singulares como'l Quesu La Fuente o'l Quesu Tarreña, ente otros, entamáu pola Dirección Xeneral de Retu Demográficu del Principáu d’Asturies y coordináu pol Institutu Gastronómicu Asturianu.
Y yá'l sábadu va tener llugar el festival Arniu Cheese Fest que, tres un parón mientres l'añu 2024, vuelve agora con una completa y entretenida programación pa tolos públicos, que podrá esfrutase mientres tola xornada. Degustaciones, maridaxes, esposición de productos locales, bébores ecolóxiques, sidra y quesos nun van faltar n'Arniu. Una de les actividaes más esperaes y novedoses ye La Cueva’l Quesu Artesanu, un percorríu inmersivu por una estensa variedá de quesos artesanos y singulares con un costu de cinco euros y onde podrán escoyese 5 quesos pa tastiar. Nun hai inscripción previa, y podrá visitase, por orde de llegada, de 12:30 a 15:00 y de 17:00 20:00 hores. Amás nun va faltar la música en vivu y l'ambiente festivu.