La escena rockera asturiana recibe un añu más el llamáu de la comunidá Unirock: los de Veiga traen un programa más completu que nunca y bandes como La Mørgue, Barón Rojo, RAGE y Blues&Decker
21 ago 2025 . Actualizado a las 12:02 h.Más que heavy metal, muncho más qu'un festival de rock. UniRock ye un exemplu de la unidá y la fuercia de voluntá característiques de la comunidá rockera y metalera: un eventu organizáu a comuña por delles persones de Veiga (Puerto de Vega) y alredores, venceyaes directa y indirectamente cola escena musical, incluyendo miembros de bandes como los míticos Legacy of Brutality o los más nuevos Aneuma. Un proyectu que sigue atendiendo pal talentu llocal ensin dexar d'amirar p'afuera, cargáu de bon rollu y ganes de pasalo podre, xestionáu dende'l pueblu y pal pueblu, con acampada y actividaes 100% gratuites y precios populares en barra y merchandising, amás de disponer de foodtrucks y serviciu d'autobuses; un proyectu que busca acoyer y agasayar a xente de toles edaes, cómo non, col filu conductor del rock y tolos xéneros venceyaos, dende'l blues al death, pasando pol swingcore, el psychobilly, el heavy rock clásico y tolo que se nos ocurra pentemedies.
El festival, siempres concienciáu con causes sociales, va volver a cuntar con un puntu violeta pa la prevención y llucha contra la violencia machista. Tamién va haber una caseta de merchandising pa financiase y siguir promoviendo acciones culturales: esti añu la organización ta enfotada de mou especial na causa palestina y la llucha contra l'imperialismu y el colonialismu. Porque l'acción ye llocal, pero'l pensamientu ye global. El programa d'esti añu, el más variáu, ambiciosu y inclusivu hasta la fecha, inclúi los conciertos del escenariu grande, actividaes pa la reciella, los yá tradicionales conciertos ambulantes y, como novedá, un vermutéu domingueru amenizáu cola música que xune a toles persones, y cada añu son más, que deciden averáse hasta Veiga a esfrutar de la esperiencia Unirock.
Vienres 22 : «Uniguah.es. Los Goonies del Metal» y Programa de Radio, na Aduana de Veiga. Xornada dedicada a reciella en familia, con especial atención pa la creatividá, la tolerancia y la inclusión, siempres dende la cultura y en particular, dende'l rock&roll.
10.30h a 12.30h - «Taller de construcción y decoración d'instrumentos musicales»: una actividá empobinada a los y les más pequenes de la casa, pa qu'esfruten caciplando col oxetivu d'iguar y orniar un instrumentu musical partiendo de materiales reciclaos. Un taller pa esfrutar en familia, siempres cola ayuda de monitores y persones venceyaes a la organización, caro, porqu'estos instrumentos van ser la clave pa les actividaes de pela tarde.
15.00h a 18.00h - «Los Goonies del Metal» ? Ginkana infantil enfotada na historia llocal de Veiga y alredores, en xenerar comunidá y en favorecer la collaboración, siempres col rock como tresfondu.
20.00h - «Radio UniRock» ? Colos compañeros de Diario de un Metalhead, Noche de Lobos, Helvete y Madera Rock.Un equipazu de comunicación que va facer un programa en directo dende Veiga.
Sábadu 23: «UniRock: Back to the Origins» na esplanada'l puertu y peles cais del pueblu.
12.00h - Apertura de puertes y Sesión Vermú al cargu de «Blister», con Pablo García de Warcry. Una formación del occidente asutianu pa dir calentando motores con una selección de versiones que va de Little Richard a Deep Purple, d'Aerosmith a Gary Moore.
16.00h - «Tributu al Rock», como manda la tradición del UniRock. Ún de los espectáculos más especiales del festival: nun escenariu móvil que va percorriendo'l pueblu, distintes formaciones de músicos amateur y profesionales igüen versiones de temes yá clásicos de tolos palos del rock. Un esitazu indudable qu'amás de poner al públicu a tonu pal platu fuerte del festival, añu tres d'añu funciona a mou de pelegrinaxe nel que la xente pue dir faciendo gastu nos distintos bares y comercios del pueblu; porque l'Unirock ye pa toos y pa toes, non sólo pa la organización. Esti festivalín ambulante tamién sirve a mou d'escenariu privilexáu pa que muncha xente (n'especial, la que nun se dedica profesionalmente a la música) puea organizase con un par d'amistaes pa ensayar y xubir a tocar una pequena selección de temes que-yos presten.
20.00h - Conciertos de la tarde na esplanada'l puertu.
«La Morgue». Esti añu les encargaes d'abrir la tarde van ser la bona xente de La Morgue col so swingcore baillongu, enérxicu y altamente recomendable pa quien busque comedia: swing y tralla a partes iguales, una propuesta única qu'escapa a les etiquetes convencionales cola que les d'Uviéu, con Rachel como frontwoman, nunca nun dexen a naide indiferente.
«Barón Rojo». Qué dicir d'ún de los grupos de referencia del heavy español... Estos vieyos rockeros lleven 45 años caleyando escenarios con himnos inmortales, influenciando a varies xeneraciones de rockeros; un suañu fechu realidá pa la xente del Unirock y una apuesta segura pa tol mundu, n'especial pal públicu más clásicu.
«RAGE». La primer banda estranxera que toca nel festival, aparte de pola so propia potencia musical, supón tamién un fitu que sienta un precedente importante: l'Unirock yá non sólo apuesta pola música llocal, asturiana y estatal, amosando asina la so vocación internacional y la intención d'establecese como una cita a nivel européu. Los de Berlín, exemplu de la escena alemana que mez heavy, speed, power y otros subxéneros del metal, pisen Veiga por vez primera con más de 40 años de conciertos y cerca de 30 discos a les espaldes. Otru apueste seguru tanto pa los metaleros «old skull» como pa la xente más nuevo.
«Blues&Decker», la banda asturiana va ufrir un conciertu col so inconfundible blues en formatu eléctricu. Estos amigos de la casa, que foron yá parte importante del resurdimientu de l'Asociación Cultural UniRock allá pel 2014, vuelven esti añu pa pesllar la nueche fuerte del festival.
Domingu 24: «Vermú Rockeru». Otra de les novedaes d'esti añu ye l'ampliación del festival hasta'l domingu, con un vermú enllenu de rock al cargu de «Coverage», «Valvulina» y «Whitexck» DJset. Trés propuestes pa poner el ramu per tolo alto a la edición más ambiciosa, variada y inclusiva d'un festival que nun apara de medrar. El Festival Unirock 2025 vuelve a los raigaños, «Back to the origins». Vémonos nel muelle.