El gobiernu d'Asturies convoca'l Premiu Amparo Pedregal 2025 pa trabayos lliterarios y d'investigación feminista
AGORA
Les dos categoríes d'esti añu son: poesía escrita por muyeres y ensayu con perspectiva de xéneru
22 ago 2025 . Actualizado a las 05:00 h.La Conseyería de Presidencia, Retu Demográficu, Igualdá y Turismu del gobiernu d'Asturies convoca, al traviés del Institutu Asturianu de la Muyer, una nueva edición del Premiu Amparo Pedregal pa trabayos lliterarios y d'investigación feminista. Esti premiu supón un homenaxe la historiadora y profesora Amparo Pedregal (1960-2015), referente del feminismu académicu asturianu, que trabayó polos derechos de les muyeres y que tovía güei sigue vixente nel pensamientu feminista, especialmente nos ámbitos de la coeducación y el derechu antidiscriminatoriu.
El concursu ta dotáu con 5000€ y divídese en dos categoríes (trabayos lliterarios escritos por muyeres y trabayos d'investigación con perspectiva de xéneru), caúna con un premiu de 2500€. En dambes categoríes van almitise obres escrites n'asturianu y en castellán.
La primer categoría, dedicada a trabayos lliterarios orixinales y inéditos escritos por muyeres, dedícase a un xéneru específicu que cambia cada añu: esti 2025 la modalidá escoyida ye la poesía. La participación nesta estaya ta llimitada a muyeres mayores d'edá, ñacíes o residentes n'Asturies o que seyan descendientes hasta segundu grau de la emigración asturiana. Tamién van almitise obres colectives. La estensión de los trabayos nun podrá ser menor de 30 páxines.
La segunda categoría ta destinada a trabayos d'investigación orixinales y inéditos, con perspectiva de xéneru y que tean rellacionaos cola igualdá ente muyeres y homes. Nésta estaya van poder participar toles persones mayores d'edá ñacíes o residentes n'Asturies, y tamién descendientes hasta segundu grau de la emigración asturiana. La estensión de los trabayos deberá tar ente 150 y 350 páxines y el xuráu va valorar el rigor metodolóxicu, l'aportación al avance del conocimientu y la aplicabilidá de los resultaos.
El plazu de presentación d'orixinales remata'l 5 de setiembre de 2025 y les candidatures pueden formalizase mesmo de forma presencial (rexistru, unvíu postal...) que telemática (corréu electrónicu). Les bases completes de la convocatoria pueden consultase equí.