L'equipu del barriu xixoniegu afronta una temporada más en Tercera RFEF tres una campaña anterior marcada poles lesiones
21 ago 2025 . Actualizado a las 11:22 h.L'Unión Club de Ceares echa a andar na temporada 2025-2026 cola anuncia del spot d'abonaos. Failo d'una manera especial, con un homenaxe a un videoxuegu pa ordenador que marcó la década de los 90, como foi PC Fútbol y un videu nel que'l propiu entrenador de la escuadra, Jorge Menéndez, ta nes oficines del club xugando, precisamente, a esi xuegu, mientees que l'árbitru ta esperando por ellos pa entamar el partíu na vida real.
Fai agora 30 temporaes, llegaba a los quioscos del PC Fútbol 4.0, el zarru de la primer etapa de la saga y el primeru que yá cuntaba con toles característiques que lo fixeron míticu pa toa una xeneración. Esti añu, la campaña de socios quier ser un agradecimientu a los sos creadores, y una alcordanza pa los grandes momentos vivíos faciendo qu'equipos modestos tocaren les nubes, remarquen dende la xunta directiva. Los interesaos en facese socios o renovar el so carné van poder facelo nos díes de partíu o averándose a les oficines del club, nel propiu estadiu de La Cruz, los miércoles pela tarde.
L'UC Ceares ta nestos momentos xugando los sos partíos de pretemporada y los alcuentros que pertenecen a la Copa Federación. Los teyeros perdieron el so primer partíu nesa competición escontra'l Mosconia por 3-0, mientres qu'ayeri, xugando en casa, ganaron 2-1 énte'l Praviano. Entá queden los partíos amistosos escontra'l Sporting C, esti sábadu na ciudá deportiva del principal equipu de la ciudá y escontra l'UP Langreo, el sábadu 30 d'agostu. La competición lliguera empieza'l día 7 de setiembre, onde'l Ceares va enfrentase como visitante al Caudal.