«Peor... ¡Imposible!»: El cine de serie B toma Xixón per asaltu la selmana del 25 al 31 d'agostu
AGORA
El ciclu algama esti añu la so XXVI edición con una propuesta centrada nos xéneros cinematográficos como ferramienta crítica d'análisis social
22 ago 2025 . Actualizado a las 12:10 h.La xente cinéfilo ta de norabona, especialmente quienes-yos presten les películes de baxu presupuestu, grandes idees y ciertu regustu «cutre». Un añu más, el ciclu cinematográficu «Peor...¡Imposible!» vuelve a Xixón cola so propuesta centrada nesi cine de cultu pa según quién, alloñáu del mainstream y del ésitu de públicu y taquilla, esi cine tantes vegaes denigráu y consideráu menor énte les superproducciones, el sistema d'estudios cinematográficos, el cine d'autor y les propuestes conceptuales o megalómanes del gran cine intelectual... La selmana del 25 al 31 d'agostu, el Centru Cultural Antiguu Institutu (CCAI) va ser la nave nodriza que nos avere esi cine a Xixón, el llamáu de serie B, que tantes allegríes y diversión nos tien dao a xeneraciones y xeneraciones d'espectadores... (y, davezu, tamién un prestor mui particular venceyáu a la vergoña ayena, hai que reconocelo). Porque esti cine ye contestatariu dende l'entamu: inventiva pa suplir la falta de medios, voluntá de crear perriba de la obsesión pol perfeccionismu y sí, quiciás cierta inconsciencia, pero ¿qué sedría del cine si sólo los grandes estudios fixeren les sos superproducciones millonaries? ¿Qué sedría del arte, si nun hubiere xente permitiéndose facer realidá les sos idees más lloques ensin llendase a siguir el modelu establecíu?
Estes entrugues y otres son les que se fai la bona xente qu'organiza y participa nel ciclu, qu'ésti añu ta dedicáu especialmente al análisis de los xéneros cinematográficos dende una perspectiva sociolóxica crítica, de los provocadores años 70 y 80 del sieglu pasáu al conformismu temáticu y formal del sieglu XXI. Jesús Parrado, coordinador del ciclu, propón una reflexón sobre esta cuestión al traviés d'una selección de películes que va del horror folklóricu a la ciencia ficción pasando per monstruos, zombis, vampiros, pantasmes, aliens, y tol abanicu de criatures y entidaes qu'hai pentemedies. Películes que nel so día foron criticaes ensin piedá y que güei, en munchos casos, pasaron a ser obres de cultu. Pongamos por casu el clásicu de 1973 «The Wicker Man» (L'home de blima), dirixida por Robin Hardy con un Christopher Lee ablucante y terrible, un pegoyu fundacional que marcó pa siempres el xéneru y que va ser el centru de la mesa reonda sobre «horror folk» del domingu 31. El programa de proyecciones va completase con delles charres y alderiques sobre temes variaos, ente los que tamién cabe destacar «(in)visibles: el papel de la muyer nel cine» el sábadu 30, un percorríu pela historia tapecida de les muyeres nel cine. Col envís d'ufrir una aprosimación lo más plural posible, habrá una riestra d'invitaos y invitaes seleccionaes p'arriquecer los debates (pueden consultase nel programa) propuestos pola organización y que tamién tarán abiertos al públicu.
«Peor... ¡Imposible!» xuega cola ironía de tratar un tema como ye'l cine «cutre» con chancia, pero al tiempu tomándolo mui en serio: l'análisis social que se plantega dende'l visionáu de serie B ye un instrumentu mui potente pa entender la deriva del cine y de la sociedá actuales. Esti ciclu ye una cita obligada si te presta ver bizarraes (sentíu estrictu y sentíu laxu), una bona dosis de melecina si careces de cinefilia y, con suerte, un bálsamu que t'ayude a llevar meyor la mancadura, si ye que sufres de conciencia crítica. El programa completu coles fiches de les películes y toles actividaes puede consultase equí o na web del conceyu de Xixón, que tamién collabora col ciclu al traviés de la Conceyalía de Cultura.