El gobiernu d'Asturies echa a andar el sellu «Artesanía de Asturias», pero escaez l'asturianu
AGORA
El distintivu va sirvir pa destacar productos artesanales asturianos, fortaleciendo'l sector y visibilizando los productos de cara pal consumidor
27 ago 2025 . Actualizado a las 05:00 h.El nuevu sellu «Artesanía de Asturias» ye una marca institucional creada pol Gobiernu d'Asturies col oxetivu de dotar d’imaxe propia, única y reconocible a los productos artesanos realizaos por profesionales de la comunidá. Esta marca impúlsase tres l’alquisición, el pasáu mes de xineru, de la propiedá del distintivu per parte del gobiernu. El nuevu sellu ta formáu por un isotipu d'inspiración celta compuestu por dos lletres A n’azul y mariellu, acompañáu del logotipu «Artesanía de Asturias».
Trátase d'una iniciativa empobinada a protexer, dar visibilidá y caltener el prestixu de l'artesanía asturiana, mesmo de les persones que conformen los distintos gremios que de les obres que producen, pagando especial atención a la diversidá d’oficios y productos que caractericen al territoriu asturianu. L'acreditación d'esti distintivu institucional va sirvir pa roblar productos artesanales fechos n’Asturies, destacando la so procedencia pa favorecer el so espardimientu y comercialización pente los consumidores. Esta marca enfótase asina en recalcar el prestixu de los talleres, profesionales y creaciones llariegues, informando claramente y de mou confiable a los consumidores sobre la naturaleza artesanal de los productos que merquen.
Tres la reciente aprobación de la so regulación pola Dirección Xeneral d’Empresa y Comerciu, el sellu entama a recibir solicitúes. El decretu regulador publicáu pola Conseyería de Ciencia, Industria y Comerciu nel BOPA establez l'usu del distintivu pa empreses y talleres artesanos que tean inscritos nel Rexistru d’Artesanía d’Asturies, ensin dexar fuera a asociaciones profesionales del sector, actividaes de promoción o comercialización de productos realizaos por asociaos que tean daos d’alta nel mentáu rexistru.
La Dirección Xeneral d'Empresa y Comerciu, una vez aprobada la so regulación, yá ta en procesu de tramitar les primeres solicitúes d’usu del sellu per parte de profesionales, talleres y empreses inscrites nel Rexistru d’Actividaes Artesanes. El plazu pa conceder l'autorización d'usu del distintivu tá establecíu nun másimu de trés meses. El procedimientu pa nueves solicitúes va caltenese abiertu de forma continuada al traviés de la sede electrónica del gobiernu d'Asturies col enfotu de convertir «Artesanía de Asturias» nun distintivu d'escelencia que seya reconocible mesmo pa productores que pa consumidores.
La promoción d'esti sellu distintivu ye una noticia escelente pa l'artesanía d'Asturies, d'una bayura y calidá sobradamente conocíes. Sicasí, un detalle llama l'atención: l'ausencia total del asturianu y el gallegu d'Asturies en tol proyectu. El sellu «Artesanía de Asturias» nun quier ser «Artesanía d'Asturies». Mesmo'l manual de marca que'l llabor promocional úfrense esclusivamente en castellán, cosa chocante, cuando menos, especialmente n'un ámbitu tan fuertemente venceyáu a la cultura y el raigañu llingüísticu d'Asturies como ye l'artesanía. Nun puede escaecese que'l propiu léxicu venceyáu a l'artesanía tien una carga llingüística mui importante: erbíes, procesos, productos, llugares de producción y hasta oficios reciben el so nome tradicional del asturianu y el gallegu d'Asturies. Esti nuevu desplante a les llingües llariegues, mesmo si se trata d'un descuidu que d'una omisión consciente, nun ye sinón otru síntoma de la falta d'enfotu institucional pa cola cuestión llingüística.
L'artesanía d'Asturies, ensin comines, ye un valor importantísimu de la nuesa cultura. Si ye mui importante ufiertala de puertes p'afuera, tampoco debería escaecese incluyir la promoción de cara p'adientro, nos mesmos idiomes de los que surde, nos que se produz y se vive'l llabor artesanal del que tan arguyosa se siente tola población asturiana. Porque, amás, les llingües llariegues son tamién un sellu distintivu que pue y debe sirvir pa diferenciase, pa potenciar esi distintivu que tantu bien pue facer a l'Artesanía d'Asturies.