Una dosis del nuevu fármacu aprobáu pola UE previén les infeiciones mientres seis meses
30 ago 2025 . Actualizado a las 05:00 h.La Unión Europea recién aprobó l'usu de Lenacapavir, un fármacu inyectable desarrolláu pol llaboratoriu Gilead que previén les infeiciones por VIH mientres seis meses. L'autorización produzse tres de l'aprobación per parte de l'Alministración d'Alimentos y Melecines de EEXX en xunu, asina como la publicación de directrices de la Organización Mundial de la Salú (OMS) qu'encamentaben el so usu como una opción pa la prevención del VIH.
Les autoridaes europees aprobaron l'usu del fármacu pela vía d'urxencia basándose nel ésitu de los ensayos realizaos pol llaboratoriu, considerándolu «de gran interés pa la salú pública». Según desplica l'espertu en VIH Jean-Michel Molina, «con alredor de 25.000 nuevos diagnósticos de VIH cada añu na UE y nel Espaciu Económicu Européu, ta claro que les opciones de prevención actuales nun funcionen pa toles persones que les necesiten o deseyen, especialmente ente les poblaciones vulnerables». Y, añede l'espertu, «el réxime de dosificación semestral y la so alta eficacia podríen ser la opción tresformadora de prevención del VIH que tábamos esperando n'Europa».
El Lenacapavir actúa inhibiendo la cápside del VIH-1 en delles etapes, estremándose asina d'otres clases d'axentes antivirales n'usu. La mayoría de los antivirales actúen namás que nuna sola fase de la replicación viral, mentantu'l Lenacapavir ta diseñáu pa torgar l'actividá del VIH en varies etapes del so ciclu de vida, ensin ufir resistencia cruzada conocida (in vitro) con otros fármacos.
El fármacu ta considerándose como una opción d'acción a llargu plazu en multitú d'estudios clínicos, tanto en fases iniciales como avanzaes. Plantégase tamién comom base pa posibles futures terapies contra'l VIH, pensando n'ufiertar opciones orales y inyectables d'acción a llargu plazu, axustando frecuencies de dosificación, en combinación o en monoterapia, acordies a les necesidaes y preferencies individuales de les persones y comunidaes afectaes pol VIH. La revista Science destacó Lenacapavir como la «Meyora del Añu 2024».
Gilead trabaya anguaño pa presentar solicitúes énte les autoridaes de dellos otros estaos. Ente los países oxetivu de Gilead alcuéntrense los 18 que representen el 70% de la carga del VIH dientro del total de 120 países presentes nos alcuerdos de llicencies voluntaries anunciaos pola farmacéutica.