La mítica banda folk asoleya un tema cantáu y otru instrumental qu'entemecen reinterpretación de la tradición y composición propia tres unos años ensin espublizar conteníu
31 ago 2025 . Actualizado a las 05:00 h.Acabó la espera. Ocho años dempués de la publicación de Cerquina y cinco del llanzamientu del cenciellu Saltones Expósitos, Felpeyu torna con un cenciellu formáu por dos temes nuevos: «Si quies que baille contigo» y «Como te digo una cosa…». Estes dos pieces continúen la llinia sonora que caracteriza a una de les bandes fundamentales del folk asturianu; sicasí, tamién tienen novedaes, ente les que rescampla la incorporación de trés componentes nuevos nuna grabación: el vocalista y baxista Aníbal Menchaca y los cuerdistes Luis Nicolás (guitarra) y Alberto Ablanedo (bouzuki).
«Como te digo una cosa…» son trés composiciones del nuestru vigulineru, Lisado Prieto. La primera d’elles ye n’alcordanza’l vigulineru escocés Angus Grant col que compartimos momentos bien prestosos. La segunda a ritmu de muñeira ye un pequeñu homenaxe a una famosa película de los ‘90, concretamente a la frase de ciertu personaxe qu’apaez nella: ‘igual que te digo una cosa dígote la otra’, al sentila vais decatavos por qué. Pa rematar, unos «Saltones del repunante», pallabra asturiana que describe a una persona que protesta por too o s’enfurruña fácilmente», desplica la banda sobre la pieza instrumental qu’abre’l cenciellu Si quies que baille contigo.
D’otra banda, el cantar que da nome al llanzamientu trátase d’una adaptación de «La romería» qu’asina presenta’l grupu: «Ye ún d’esos cantares asturianos de chigre con milenta versiones; de coros, de solistes, de grupos folk… esta ye la nuestra. Como ye vezu nos nuestros cantares, garramos un cachín de la lletra tradicional y escribimos el restu, nesti casu ye la primer lletra qu’escribe Aníbal pa Felpeyu. Nella garra l’espíritu folixeru de la orixinal con un aire un pelín más señaldosu, pero como una afirmación de qu’anque pasen los años, equí siguimos».
Tardaron ocho años n’asoleyar material nuevu, pero eso nun significa que’l grupu parare. Como desplica Ruma Barbero, bodhrán y fundador de Felpeyu, «al poco de grabar tuvimos que cambiar de cantante. Dempués foi la pandemia; la gran pérdida d’Elías García; munchos cambios na formación y na banda de los que tuvimos que dir recuperándonos nesti tiempu». El músicu tamién sorraya que llaboralmente tuvieron que «buscase la vida na enseñanza. «Agora somos un grupu de profesores que podemos trabayar na música los fines de selmana y too esto fai que’l procesu seya más lentu, pero non con menos entusiasmu».
D’esta manera, la mítica banda de folk asturianu acústicu y atlánticu ta trabayando yá en temes nuevos: «Tenemos yá un tema instrumental y otru cantáu que tán un pelín más qu’abocetaos y la idea ye siguir sacando temes de dos en dos, pero ensin saber plazu», desplica Barbero. Mentanto, va poder esfrutase de Felpeyu nos conciertos. El siguiente ye’l 6 de setiembre nel Festival Internacional de la Gaita de Villaviciosa -nun conciertu compartíu cola programación de los actos del Día d’Asturies qu’entama’l gobiernu asturianu- y el 20 setiembre nel festival Irish Fleadh de Cáceres.
34 años dempués, Felpeyu siguen marcando una llinia fundamental na música asturiana y amosando’l so bon facer en Si quies que baille contigo. Son veteranos d’una escena que, en pallabres del fundador del grupu, «tien propuestes dispares, nueves y alternatives que xunto a la de la xente vieyo formamos una bayura musical que va unos años nun había».