L'amuesa, comisariada por Natalia Alonso Arduengo, va tar disponible nel edificiu polivalente del 26 al 2 de payares
04 sep 2025 . Actualizado a las 05:00 h.El Centru Niemeyer va acoyer la esposición ‘La imaxe, lo tapecío’, del artista ribeseyanu Pablo Casanueva, del vienres 26 de setiembre al domingu 2 de payares, un proyectu nel que la fotografía y el cine conviértense en ferramientes pa restaurar la memoria y confrontar la esmemoria, comisariada por Natalia Alonso Arduengo.
Partiendo del so archivu familiar, Casanueva busca no escondío y no discreto les buelgues d'una verdá callada. Les imaxes dialoguen col poder y coles fractures de la memoria, asitiando lo político nel terrén íntimu. La esposición va poder visitase nel Edificiu Polivalente del centru cultural avilesín, de llunes a domingu 10:30 a 14:30 y de 15:30 a 19:30 hores.
“Decidí entamar un viaxe iniciáticu al traviés de les fotografíes y documentos que mio madre guardaba. Atopé munches respuestes viendo les imaxes que se caltuvieren, mirando nos reversos, les notes tachaes, les feches y firmes y tratando d'ordenar y poner nome les cares d'eses persones que pa mi yeren totalmente desconocíes pero conocía un filu familiar-xenéticu que me conectaba con elles de forma intensa”, esplica Casanueva.
La esposición sigue la investigación del artista sobre los percorríos políticos de la so familia, Los Luna, nun procesu que combina archivos públicos, documentos personales y restos visuales. Nesta reconstrucción remanecen el mieu como abellugu, el duelu como radiografía del dolor y la esperanza como compromisu políticu. “Casanueva recupera l'archivu familiar del escaezu. Investiga al traviés de la fotografía y el cine afrontando la multiplicidá de capes qu'ufierta cada mediu cola meticulosidá de la restauradora de pintura mural de la Ilesia de San Salvador de Moru y que'l so minuciosu procesu se recueye na película”, sorraya la comisaria de l'amuesa, Natalia Alonso Arduengo.
Con esti proyectu, Casanueva propón facer grande lo pequeño, dar espaciu a lo escaecío y otorgar visibilidá a aquello que nos configura. La obra esplégase tanto na sala como nel filme, ufiertando al visitante un viaxe ente pasáu, presente y futuru, como quien restaura les pintures d'una ilesia quemada: una acción de resistencia, memoria y dignidá.