El texíu asociativu del conceyu y la comunidá llocal fueron claves na recuperación del so usu
10 sep 2025 . Actualizado a las 05:00 h.La Conseyería de Cultura, Política Llingüística y Deporte aprobó la inclusión del traxe tradicional de Cabranes nel Censu del Patrimoniu Cultural Inmaterial d’Asturies. El llamáu traxe de Cabranes constituye una manifestación cultural de gran singularidá, vinculada a la tradición de la procesión y ufierta del ramu, sobre manera nel Carme de Torazu, declarada Fiesta d’Interés Turísticu del Principáu. Trátase d’una indumentaria tradicional femenina de calter austeru y monocromáticu, onde destaquen elementos propios como’l xubón y el dengue característicu con picu sobre’l pechu, que la estremen d’otros vestuarios tradicionales asturianos.
El procesu de recuperación del traxe empezó nos años noventa gracies a la investigación etnográfica y afianzóse a partir del 2014 col programa ‘Alcordanza: Historia, cultura y tradición’, impulsáu pol Muséu de la Escuela Rural d’Asturies en collaboración col Conceyu de Cabranes. Dende’l 2018, talleres formativos interxeneracionales fixeron posible reactivar el so usu nes celebraciones locales, convirtiéndose nun exemplu de participación ciudadana alredor del patrimoniu.
El conxuntu del traxe de Cabranes ta compuestu por falda y mandil negros, medies delgaes escures, zapatos clásicos de tacón baxu, xubón axustáu con mangues abullonaes y tables nel costazu y l’antebrazu, y el dengue, prenda distintiva que s’axusta sobre’l pechu y resalta la silueta. Compleméntase con un pañuelu de seda de colores estampaos na cabeza y un pañuelu blancu de filo nel costazu pa llevar el ramu. La so sobriedá en negro, chiscada por detalles de color nos pañuelos y adornos de pasamanería, conviértelu nun atuendu únicu, reconocible dafechu na tradición festiva de Cabranes. Esta indumentaria atópase documentada fotográficamente nes primeres décades del s. XX por Juan Evangelista Canellada principalmente.
Testimonios fotográficos, orales, amás de prendes testigu, corroboren que, ente otres fiestes del conceyu de Cabranes, usábase nel Rosariu de Santolaya, nel Carme d’Arboleya o en Xiranes; y, sobre manera, nel Carme de Torazu, que se celebra l’últimu domingu del mes d’agostu, pues yera y sigue siendo anguaño la procesión más representativa, pola cantidá de ramos axuntaos. Esta celebración tien significación especial pola so antigüedá con cofradería creada en 1766- y pervivencia hasta’l presente, amás de pola so entidá desfilando más de trenta ramos- polo que ta considerada la mayor procesión de ramos d’Asturies, tando declarada Fiesta d’Interés Turísticu del Principáu d’Asturies.