La institución académica va superar de nuevu los 20.000 estudiantes
10 sep 2025 . Actualizado a las 17:53 h.La Universidá d'Uviéu empecipió esti 9 de setiembre'l cursu 2025-2026 con un crecimientu nel númberu d'estudiantes. Les matrícules n'estudios de grau crecieron más d'un 6 % al respective de les mesmes feches del añu pasáu, pasando de 16.842 a un total de 17.863 persones qu'empiecen güei'l periodu lectivu del primer cuatrimestre. No que cinca al nuevu ingresu, l'ascensu nel númberu de matrícules ye superior al 10%, con un total de 4.683 estudiantes hasta'l momentu. Una cifra que va xubir nes próximes selmanes, yá que sigue abiertu'l periodu de matrícula.
Con ello, la institución académica asturiana va sumar de nuevu más de 20.000 estudiantes, la mayoría d'ellos matriculaos nos títulos de grau o doble grau ufiertaos. Amás, a fecha de güei rexistráronse casi 1.700 matrícules n'estudios de máster y más de 1.100 en programes de doctoráu.
El rector, Ignacio Villaverde, amosóse satisfechu con estos datos, entá provisionales. «La medría de matrícula ye una magnífica noticia pa la Universidá d'Uviéu y supón un estímulu pa empezar esti cursu nel que tenemos que caltener la excelencia formativa y siguir trabayando p'ameyorar y actualizar la nuesa ufierta. Superar de nuevu la cifra de los 20.000 estudiantes confirma que siguimos siendo una institución de referencia y quiero agradecer el trabayu y la planificación de quien faen posible que cada añu imparten más de 420.000 hores de docencia», resaltó Villaverde.
El cursu 2025-2026 suma más de 420.000 hores d'actividá docente, repartíes en 4.902 asignatures, de les que 3.350 correspuenden a grau y 1.552 a máster. Contémplense, amás, 25.934 grupos d'actividá pa la totalidá del periodu lectivu, ente clases espositives, práctiques d'aula, de llaboratoriu, de campu y clíniques, ente otres. Too ello nel marcu de 130 programes d'estudios (60 graos, 59 másteres y 11 dobles titulaciones).