La becada va desenvolver un proyectu nel que'l versu s'integra cola escritura diarística y con otros tipos de discursu que se manden de la prosa
12 sep 2025 . Actualizado a las 12:46 h.La V Residencia Asturies de lliteratura qu'impulsa la Conseyería de Cultura, Política Llingüística y Deporte yá tien residente pa esta edición: Marta Mori de Arriba (Xixón, 1965), que va contar con un mes d'estancia n'A Coruña pa deselvolver el so proyectu lliterariu en llingua asturiana.
El xuráu compuestu pol xestor cultural Dolfo Camilo Díaz, la escritora Patricia Suárez y el filólogu Luis Casteleiro decidió por unanimidá conceder nesti 2025 la beca a la escritora y estudiosa de la llingua y la lliteratura asturiana Marta Mori pol so proyectu L'amor sombra.
Nel so fallu, el xuráu destacó «l'ambición intelectual y artística grande d'una propuesta que bancia ente lo autobiográfico y lo artística, combinando xéneros variaos (llírica, narrativa, ensayu y diariu) pa componer el rellatu retrospectivu y fragmentáu d'una historia d'amor y duelu».
Marta Mori de Arriba y L'amor sombra
El proyectu becáu tien como puntu de partida un diariu, na llinia del conocíu Journal de deuil, de Roland Barthes (1979). Les entraes que se reproducen nel trabay, fragmentaries y non siempre n'orde cronolóxicu, combínense con fragmentos de la obra mentada de Barthes y con poemes que se rellacionen temáticamente con ellos, ampliando per aciu de la escritura poética y de la traducción la espresión del duelu.
Marta Mori (Xixón, 1965) ye llicenciada y doctora en Filoloxía Hispánica pola Universidá d'Uviéu, miembru de númberu de l'Academia de la Llingua Asturiana y catedrática de Lengua Castellana y Literatura nel IES Xovellanos de Xixón. Ye directora de la revista Lliteratura y foi ganadora de los premios «Teodoro Cuesta» y «Xuan María Acebal» de Poesía.
El pesu del currículum y el percorríu académicu de Marta Mori ye de gran interés y la so figura encarna l'espíritu d'oportunidá, finalidá y la proyección inherente a la condición que la beca V Residencia Asturies busca.