La institución ufierta esta propuesta, pa la que namás hai qu'acutar plaza
13 sep 2025 . Actualizado a las 05:00 h.La Xunta Xeneral de Asturies quier averar el so trabayu a la ciudadanía y abre les puertes de la so sede otra vuelta, nel Palaciu de la cai Fruela d'Uviéu, con un programa de visites guiaes gratuites. Al traviés d'estos percorríos, cualquier persona puede conocer de primer mano cómo funciona'l Parlamentu asturianu y adientrase en dalgunos de los sos espacios más representativos.
Les visites tienen de solicitase primeramente al Serviciu de Relaciones Institucionales, yá seya per teléfonu (985 107 485 / 985 107 500) o al traviés del corréu electrónicu visitas@jgpa.es
Cada percorríu tien una duración averada d'una hora, ta dirixíu a grupos d'hasta 25 persones y entámase los llunes, xueves y vienres n'horariu de mañana, de 9 a 14 hores, a lo llargo de tol añu.
Mientres la visita vas poder allegate a estancies como la Sala Xovellanos, onde s'axunten les comisiones parlamentaries, o al Hemiciclu, inauguráu en 1998 tres una importante reforma y que güei acueye les sesiones plenaries de los 45 diputaos y diputaes de la Cámara. Tamién formen parte del itinerariu otros espacios singulares, como la Sala de la Constitución o'l Salón Europa.
Con esta iniciativa, la institución ábrese al públicu pa dar a conocer la so hestoria, esplicar les sos funciones y amosar cómo se desenvuelve'l día ente día de la vida parlamentaria, nuna esperiencia que resulta interesante tanto pa escolares como pa persones adultes.