Trabáu tendrá 3 díes dedicaos a la cultura y l'ociu
15 sep 2025 . Actualizado a las 11:56 h.Del 19 al 21 de setiembre del 2025 va tener llugar en Trabáu (Degaña) la edición 2025 del festival CachuFest, un festival que per segundu añu axunta cultura, tradición, naturaleza, patrimoniu y etnografía nuna contorna privilexada como ye l'aldega de Trabáu nel conceyu de Degaña. Un alcuentru pa poner de relieve la cultura y tradición del suroccidente d'Asturies, y en particular la maraviyosa tierra de los cunqueiros.
Esti festival tien como unu de los sos oxetivos principales potenciar y dinamizar la ufierta cultural en zones rurales del suroccidente d'Asturies al traviés de la organización d'un festival de música qu'inclúi numberoses actividaes culturales complementaries al aire llibre, asina como n'espacios abandonaos, en desusu o infrautilizados. Mientres la fin de selmana va haber una programación variada d'actividaes qu'inclúin conciertos, visites guiaes, cates, demostración d'oficios tradicionales, xuegos tradicionales y muncho más.
Mientres el vienres y el sábadu, n'horariu nocherniegu, van pasar pol escenariu del CachuFest dalgunos de los grupos más representativos a nivel rexonal y nacional de la música tradicional, incluyendo De Ninghures y Alana (Galicia), Dulzaro (Castiella y Llión), Cuélebre (Madrid) mesmo que Llevólu’L Sumiciu, Guieldu, Picarós y Abéu d'Asturies. Los abonos p'adultos tán disponibles a 44,90 euros na páxina https://my.weezevent.com/cachufest25 y los residentes d'Ibias y Degaña tienen un preciu amenorgáu de 24,90 euros. Como novedá más importante, nesta edición va implementase una solución cashless que va dexar a los asistentes utilizar pulseres pa realizar toles sos compres tanto en barra como nos puestos de comida y merchandising. El festival cunta con zona d'acampada, aparcamientu de campers y autocaravanes, amás de baños y duches gratuites.
No que cinca a les actividaes paraleles, destaca l'homenaxe a Rosa Cunqueira, finada en 2024 y que dedicó tola so vida a defender, espublizar y caltener la tradición, la cultura y la variante cunqueira del asturianu, y de forma mui particular la de los pueblos cunqueiros. Artesana, panderetera, divulgadora, escritora y muncho más, Rosa dexó una alcordanza imborrable y la familia decidió rindi-y l'homenaxe que se merez mientres el festival, incluyendo la inauguración d'una estatua nel so honor a partir de les 11h del domingu 21 nos esteriores de La Guarida del Cunqueiro.