El maestru llevó la música asturiana al ésitu col proyectu Xentiquina
15 sep 2025 . Actualizado a las 13:05 h.Nacho Fonseca va recibir una de les medayes d'Asturies qu'esti añu entrega el gobiernu asturianu. Asina lo comunicó Adrián Barbón nel conseyu de gobiernu. Maestru, especialista en filoloxía, supo fomentar la enseñanza de la llingua asturiana al traviés de la música. Nel cursu 1987-1988 fundó'l grupu Xentiquina nel Colexu Públicu Solvay-Llieres, en Siero, qu'agora lleva'l nome d'aquel coru infantil de gran ésitu pol que pasaron más de 200 estudiantes. Nun momentu nel qu'apenes había materiales pedagóxicos pal aprendizaxe de la llingua asturiana, Fonseca utilizó cantares populares y composiciones propies pa enseñar al so alumnáu mientres 25 años.
Amás de la medaya a Nacho Fonseca, va facese entrega tamién al Real Uviéu, nel so añu del centenariu; l'Asociación Emburria, que llucha pola inclusión social; el gran divulgador de la canción asturiana, Joaquín Pixán y a Isidoro Nicieza, exdirector de La Nueva España.
Amás, van ser nomaos fíos predilectos Juan Antonio Pérez Simón, empresariu y coleccionista d'arte; Isidro Fernández Rozada, fundador d'Alianza Popular; Mari Luz Cristobal Caunedo, lleenda de l'asturianada y José Sierra Fernández, alcalde de Grau mientres 23 años.
A lo último, van ser nomaos fíos adoptivos Paz Fernández Felgueroso, exalcaldesa de Xixón, Saul Craviotto, piragüista y medallista olímpicu, la periodista Maruja Torres, la historiadora del arte Yayoi Kawamura, el director de la Fundación Vinjoy, Adolfo Rivas y Consuelo Martínez, catedrática de Álxebra na Universidá d'Uviéu.