L'autor presenta Memoria de la nisal en Xixón esti mes d'ochobre, obra cola que ganó en 2023 el premiu Asturies Xoven de Testos Teatrales.
18 sep 2025 . Actualizado a las 11:44 h.Tituláu superior en dramaturxa pola ESAD de Galicia, Ernesto Is anteriormente fórmase como realizador y productor audiovisual. Ganador del premiu Asturies Xoven de Testos Teatrales nel añu 2023 con Memoria de la nisal, ye la obra qu'agora presenta per primer vez nel Teatru Xovellanos de Xixón nel mes d'ochobre. Dirixida por Adrián Conde y Gemma de Luis, Memoria de la nisal reflexona sobre'l silenciu, l'escaezu y la memoria hestórica.
—El próximu mes d’ochobre llega al Teatru Xovellanos Memoria de la nisal, dirixida por Adrián Conde y Gemma de Luis. ¿Qué sientes al ver esta obra representada?
—Muncha allegría. El teatru escríbese pa ser representáu, asina que cada obra que llega a les tables ye motivu de felicidá. Más aún una obra como esta que ye la primera qu’estreno na mio ciudá, cola que se me ta dando a conocer nel mundu escénicu y lliterariu d’Asturies y que, amás, rescata pal presente un fechu de la nuesa historia recién. Escribo teatru pa compartilo coles persones, por eso creo que cada representación o llectura de dalguna de les mios pieces avérame un poco más a los mios contemporaneos. Ye una especie de diálogu silenciosu qu'establezo con desconocíos y, eso, ye perguapo.
—La obra cunta la realidá de los neños y neñes de la guerra al traviés de la hestoria de trés hermanes y la so madre. ¿Cómo surde la necesidá de cuntar una hestoria d’esti tipu?
—La obra naz dempués de ver otra obra. En mayu de 2023, averéme a una representación d'El xardín de les cereces per parte del colectivu belga STAN nel Théâtre Les Célestins de Lyon. El testu de Chéjov y la maraviyosa puesta n'escena de la compañía conectó con una idea que me llevaba rondando la cabeza dende va tiempu: ¿qué pasa cuando una persona exiliada torna a lo que, dalgún día, foi la so casa? ¿Qué efectos tien esa vuelta nella y na so familia? Como la pieza del dramaturgu rusu fala de familia, de memoria, d'identidá, intenté buscar na mio hestoria personal, y también na hestoria d'Asturies, fechos concretos qu'englobasen, de dalguna manera, estes temátiques que, según más escribo, voi dando cuenta que son el motor de la mio producción dramática. Amás, creo qu'esti país tien una delda bien grande col so pasáu. Como sociedá, nun podemos ignorar que somos el resultáu de lo qu'asocedió na Guerra Civil y la dictadura franquista. Escaecer que, día ente día, caminamos sobre miles de foses comunes, ye una terrible irresponsabilidá. El gran cuentu equidistante de la guerra ente hermanos o de la reconciliación nacional yá nun cuela. El fascismu nunca marchó, ye más, agora ta totalmente envalentonáu, y el nuesu deber como ciudadanos y ciudadanes ye saber d'ónde venimos pa tener claro a ónde nun queremos volver.
—Esos neños de la guerra colaron dende’l puertu de Xixón en setiembre del añu 1937 y llegaron a Leningrado precisamente un 4 d’ochobre. ¿Una coincidencia mui poética?
—Xusticia poética, eso seguro. Hai un versu d'un poema de Silvina Ocampo que diz: «no inventes lo que no quieras que exista». L’actu creativu dexa conformar realidaes bien distintes a lo conocío. Memoria de la nisal ye una obra de ficción, pero con una base histórica real que se xune a la mio hestoria familiar. Los mios personaxes tienen trazos de mio güela, pero tamién de lo que rellata Nieves Cuesta Suárez, neña de la guerra asturiana, nel so llibru de memories Simplemente mi vida. Na obra combino lo qu'asocedió colo que pudo asoceder pa crear un universu propiu, nel que trato de dar voz a eses pequeñes hestories que quedaron nos marxes de la Hestoria, con mayúscules. Rescato esti fechu del nuesu pasáu porque nun me presta esti presente nel que los gobiernos autonómicos de la derecha estrema y la estrema derecha deroguen lleis de memoria histórica o nel que la comunidá internacional nun fai nada pa detener el xenocidiu qu'Israel ta perpetrando contra'l pueblu palestín. El teatru ye memoria y, nestos tiempos, poques coses hai más revolucionaries que remontase contra la tiranía del olvidu.
—Memoria de la nisal ye, amás, Premiu Xoven de Testos Teatrales 2023 y Premiu Xovellanos a la Producción Escénica 2025. ¿Qué crees que tien esta obra que llama tanto l’atención?
—El teatru de corte históricu, como señala Juan Mayorga, diz más sobre la época que lo produz que sobre la época que representa. La mio obra toca temátiques que, por desgracia, tán d'actualidá: la guerra, el silenciu represivu que s'impón tres un conflictu, la violencia contra les muyeres y los neños, la esraizadura, los arrenuncios éticos que tienes que facer pa sobrevivir… Nun ye una obra fácil, nin pal públicu nin pal equipu artísticu que la fai. Dende la escritura, yera bien importante amosar la realidá política y social de la posguerra tal como foi. Creo que l'equipu d'esti montaxe fixo un gran trabayu, porque supo combinar a la perfección la sensibilidá más lliteraria y poética del testu cola crudeza de lo que nél se cunta.
—Empoderamientu, exiliu, infancia, maternidá, memoria… ¿Cuánto hai d'autobiográfico en Memoria de la nisal?
—Hai dalgunes coses, especialmente les que tienen que ver coles relaciones familiares, los llugares o les alcordances y non tanto colo político o hestórico. De toes formes, dende que pones daqué sobre'l papel, por muncha carga autobiográfica que tenga, yá ye ficción. Escribir ye una forma de rellacionase col mundu.
—La so representación, que ye la primera pa públicu adultu d’esta compañía, vien con nomes reconocíos, como Bea Canteli o Paula Mata y ta dirixida por Adrián Conde y Gemma de Luis. ¿Hubo momentos de conversación con ellos pa guiar a los directores?
—La compañía siempres tuvo en contactu conmigo dende'l minutu unu del procesu, aldericando, entrugando, cuestionando lo que yo escribiera. Esa ye la maxa del teatru, consiguir que l'alcuentru d'un grupu de persones distintes produza una hestoria pa compartir con más persones. Yo escribí un testu que creció bien gracies al trabayu d'Adrián y Gemma, de les actrices y del restu del equipu: Félix Gama na lluz, Inés Argüelles nel vestuariu y la caracterización, Óscar Muñoz na escenografía, Fernando Blanco nel espaciu sonoru, y Carolina Bello na producción. El teatru ye l'arte de la reunión. Ye necesario reivindicar y protexer estos espacios de collaboración nun mundu cada vez más deshumanizáu ya individualista.
—Como parte activa del mundu artísticu, ¿cómo ves la situación del teatru n’Asturies? ¿Qué crees que-y fai falta?
—Anque ye cierto que, nos últimos años, la situación ameyoró abondo, creo que falta un pequeñu impulsu na escena asturiana p'algamar el nivel ideal de profesionalización. Y esti impulsu nun tien que dase namás dende les compañíes y les creadores, que vienen desenvolviendo un trabayu más que dignu ya interesante, magar los escasos recursos, sinón tamién dende l'alministración. Potenciar la rede escénica d'exhibición, ameyorar les ayudes a la producción, abrir los teatros y espacios escénicos públicos a la creación en residencia, incentivar los premios o beques de escritura dramática, invertir na infraestructura técnica de los teatros, recuperar la especialidá de dirección escénica y dramaturxa pa la ESAD y crear la d'escenografía pa formar profesionales n'Asturies… El Gobiernu del Principáu tien que protexer les sos artes escéniques, y la meyor forma ye dando recursos dignos a los sos profesionales. Talentu hai.
—Según la encuesta d’hábitos y práctiques culturales, el teatru ye namás consumíu por un 25% de la población, mientres que’l cine dobla la cantidá al 50%. ¿En qué crees que se ta fallando pa qu’esi consumu tenga tanta diferencia?
—Educación y sensibilidá. Si yo trabayo nel teatru, ente otres coses, ye porque'l colexu públicu nel qu'estudié llevábanos tolos años a dalgún espectáculu de FETEN, y casi tolos cursos montábamos una obra y solíemos lleer pequeñes pieces infantiles en clase. Había un llabor pedagóxicu bien grande de los mios profesores p'averanos a esti arte. Tuvi muncha suerte, porque’l teatru ye una de les más grandes espresiones humanes, y que nun tea integrada nel sistema educativu públicu, dependiendo de la voluntá d'un docente o d'una actividá extraescolar pa esperimentala, ye daqué que nun entiendo. Munches vegaes, l'averamientu que los neños y les neñes faen al teatru ye a una cosa seria y bien intelectual, lo que provoca, na edá adulta, refugu por consideralo aburríu. ¿Por qué llevar a los chavales d'un institutu a una representación de teatru clásicu (que tamién ye necesario que lo conozan) cuando puede motiva-yos más el Hamlet de Guayominí o Yo la quería de Higiénico Papel Teatro? La vegada que fui al National Theatre de Londres sorprendióme la cantidá de mozos y moces qu'había ente'l públicu, depués esplicáronme que los colexos trabayen con ellos nuna asignatura específica dende’l testu de la obra hasta los oficios de la escena. El teatru nun puede ser daqué ayeno a la xente porque esa ye, precisamente, la so esencia: la comunidá.