El proyectu tien por oxetivu recuperar, caltener y visibilizar el valor del patrimoniu testil asturianu como parte fundamental de la identidá colectiva
24 sep 2025 . Actualizado a las 05:00 h.Va 35 años que Confecciones Gijón cerró la fábrica de camises IKE y anunció'l cese de 277 puestos de trabayu tres el cúmulu de deldes que la fixeron inviable. Yera'l remate a una década decayente qu'empecipió cola crisis del sector testil européu y aumentó con planes de reconversión, baxes voluntaries o xubilaciones anticipaes, intervención de l'alministración rexonal y fracasu tres fracasu en proyectos de futuru y recolocaciones. El zarru nun evitó que 180 trabayadores ocuparen les instalaciones mientres 45 meses y terminaren adquiriendo'l edificiu en puya pública pa vendelo darréu a una constructora. Un exemplu de llucha protagonizada por muyeres que nun dexó indiferente a naide.
Agora, una nueva edición de Moda con Historia, un proyectu interdepartamental de la Fundación Municipal de Cultura, Educación y Universidá Popular, nel Centru de Cultura Antiguu Institutu de Xixón, recueye la so hestoria de llucha y reivindicación. Va ser al traviés de delles actividaes previstes a lo llargo del mes d'ochobre. D'una banda, La Universidá Popular va entamar un cursu col nome «Muyeres nes fábriques. Industrialización, llucha y llegáu en Xixón», que va percorrer la hestoria industrial de la ciudá al traviés de la presencia de les muyeres nes fábriques, dende les cigarreres a les muyeres d'IKE.
Amás d'eso, el 21 d'ochobre pa proyectase'l documental «Costuras abiertas: Las mujeres de IKE», dirixíu por Mónica Yougueros y que narra la hestoria de la fábrica al traviés de tres muyeres que tuvieron nes reivindicaciones y les sos fíes. Tamién cuatro esposiciones van recordar la reivindicación d'IKE, repartíes nos CMI d'El Coto y El Llano, el Muséu de la Ciudadela de Celestino Solar y el Muséu del Pueblu d'Asturies.
A lo último, van ufiertase una serie de conferencies que van percorrer el papel de la muyer na hestoria industrial de Xixón, qu'incluyen el so papel nos sindicates, la conflictividá obrera, la solidaridá qu'esistió nesa dómina o testimonios de les extrabayadores. Como piesllu a esta edición de Moda con historia, el 29 d'ochobre van facese otres dos conferencies más al rodiu de les pioneres na industrialización y les voces escaecíes de les muyeres na fábrica, xunto cola proyección de «Las de IKE», documental de Samu Fuentes, testimonios d'extrabayadores y la colocación d'una placa conmemorativa.