El primer cursu entama colos niveles A1, A2, B1 y C1; el B2 va añedise pal añu próximu
24 sep 2025 . Actualizado a las 11:35 h.El Gobiernu d'Asturies empecipia'l procedimientu pa ufiertar per primer vegada la enseñanza de llingua asturiana nes Escueles Oficiales d'Idiomes (EOI). L'estrenu va tener llugar esti cursu académicu 2025-2026, na modalidá presencial, na EOI d'Uviéu. La Conseyería d'Educación publicó nel portal institucional Educastur la convocatoria y el calendariu d'esti procesu estraordinariu d'almisión d'alumnáu. El plazu de presentación de solicitúes ta yá abiertu y va cerrase'l llunes.
Les llistes provisionales van publicase'l 1 d'ochobre, con dos díes pa presentar allegaciones (1 y 2), mientres que'l llunes 6 d'ochobre van publicase les llistes definitives. A lo último, el periodu de matriculación va tar abiertu del 6 al 8 d'ochobre, dambos inclusive.
Según establez el nuevu decretu aprobáu a finales d'agostu, que modifica'l d'ordenación de les enseñances d'idiomes de réxime especial de 2018, la introducción del asturianu va llevase a cabu esti cursu nos niveles básicos A1 y A2, l'intermediu B1 y l'avanzáu C1. El próximu añu ta prevista la incorporación del nivel intermediu B2. La ufierta formativa inicial va constar de cuatro grupos -unu per cada nivel-, con una ratio máxima de 25 estudiantes per grupu. Esi nuevu decretu establez tamién que la implantación de la llingua asturiana nes Escueles Oficiales d'Idiomes va facese de manera progresiva y atendiendo a criterios de suficiencia presupuestaria y disponibilidá, mesmo que de la ufierta que puedan asumir les distintes escueles. Nun futuru contémplase tamién la enseñanza del eonaviegu, que tendrá de completar primero la normativa de los niveles de certificación.
Esta iniciativa súmase al estrenu, tamién nesti nuevu cursu escolar, de la enseñanza del asturianu nel segundu ciclu d'Educación Infantil, otru de los compromisos del Gobiernu pa promocionar les llingües autóctones.