Sofía Castañón gana el XXXI Premio «Xuan María Acebal» de poesía cola obra «Esti amor asturfalante»

La Conseyería de Cultura, Política Llingüística y Deporte escoyó'l poemariu Esti amor asturfalante, de la escritora Sofía Castañón, como ganador de la XXXI edición del Premiu Xuan María Acebal de poesía n'asturianu.

El xuráu destacó «la madurez de la obra, la so capacidá de conmover y remover emociones, un usu del asturianu especialmente curiáu y la solvencia na estructura d'un poemariu nel qu'una hestoria d'amor, una hestoria sobre'l llinguaxe y un contestu afectáu pel mundu entellácense nun testu con versos de llargu aliendu».

El director xeneral d'Acción Cultural y Normalización Llingüística, Antón García, presidió l'equipu de persones espertes encargaes de valorar les obres, que tuvo integráu pola filóloga Iris Quintana y los poetes Taresa Lorences, Alba González Sanz, Rodrigo Olay y Miguel Rodríguez Monteavaro, esti últimu ganador de la edición pasada. Actuó como secretaria Laura Marcos, filóloga de la conseyería.

Sofía Castañón nació en Xixón en 1983. Ye escritora y realizadora audiovisual. En 2006 ganó'l premiu Asturies Nuevu de Poesía con Animales interiores (Trabe, 2007) y en 2009 consiguió'l Nené Losada Rico con Tiempu de render (Trabe, 2010), un poemariu n'asturianu escritu nel tiempu que pasó na Residencia d'Estudiantes tres consiguir la beca de creación del Ayuntamientu de Madrid. De magar, escribió y publicó diversos poemarios y collabora con medios de comunicación asturianos, como La Nueva España, El Comercio o La Voz d'Asturies, y d'ámbitu estatal, como El Huffington Post, eldiario.es, Diagonal o Climática.

Nel terrén audiovisual destaca'l so llargumetraxe documental Se dice poeta (2014), sobre'l panorama poéticu contemporaneu dende la perspectiva de xéneru. En 2021 robló'l so segundu documental Que sirva de ejemplo. 

---

---

---