«Namás Dragones», la propuesta de poesía escénica n'asturianu de la Nueche Blanca d'Uviéu
AGORA
Nomes como Miguel R. Monteavaro, Sofía Castañón, Nacho Vegas o Aníbal González protagonicen l'eventu
02 oct 2025 . Actualizado a las 05:00 h.La ufierta cultural de la Nueche Blanca d’Uviéu ábrese al asturianu ya inclúi la propuesta «Namás Dragones», un proyectu que coordina'l poeta Miguel Rodríguez Monteavaro. Trátase d’un festival de poesía espandida que va tener llugar la nueche del sábadu 4 d’ochobre de 20:00h a 23:00h na Sala de Cámara del Auditoriu, na Plaza del Fresno. «Namás Dragones» ye un nuevu festival de poesía escénica n’asturianu onde s’aglutina’l conxuntu de creadores con vocación d’aumentar les dimensiones poétiques más allá de los llibros. La poesía asturiana ta n’auxe y son necesarios los espacios pa qu’esta vaya conociendo nueves víes de desarrollu. «Namás Dragones» ye performance, ye escenariu, ye palabra, imaxe, son y movimientu: la poesía nes tables.
Nesta primer edición van llevase a cabu tres performances. La primera va ser un homenaxe al recientemente fallecíu Xuan Bello (20:00), colos músicos Andrés Rodrigues y Pepín de Muñalén, recordando al que foi y será unu de los mayores talentos de la lliteratura asturiana del últimu sieglu. La segunda propuesta trainos a la poeta Sofía Castañón y al cantante Nacho Vegas na so primer colaboración artística xuntos, col proyectu Poemes que quiximos escribir (21:00).
Pa rematar (22:00), va interpretase la performance con Percepción, un espectáculu del poeta Aníbal González y la mediadora comunicativa Anaí Ruiz cola collaboración del músicu Tomás Flórez y el bailarín Jaime González. Un esperimentu escénicu que mez pallabra, danza y música nuna reflexón sensorial y cognitiva. Una conversación ente munchos y ente naide, ente un 'yo' impuestu y ayenu y otru que, quiciás, nun esiste siquiera. Un diálogu ente lo percibío y lo sentío. Nesta travesía les pallabres van reposar -y axitase- sobre un paisaxe sonoru amplificáu pol dinamismu del cuerpu que lu percuerre.