Esti llibru, escritu a comuña por Nacho Fonseca, Sidoro Villa Costales y Daniel García Granda, atropa setenta y cinco artículos d’opinión esbillaos ente los munchos que caún d’estos autores escribieron nun diariu asturianu a lo llargo de la primer y segunda décades d’esti sieglu; Publicábenlos regularmente na sección local de Siero y Centro, siempre n’asturianu, y caracterícense toos por una güeyada sobre la realidá política y social del conceyu Siero y Asturies desprexuiciada y ayena al aforfugu del paecer puntual sobre los asuntos apremiantes de la realidá diaria, pero non por ello quitos de crítica a los gobernantes o les instituciones, anque col procuru d’exercela ensin gafura.
Los temes trataos nos artículos son amplios y variaos, gobernaos pol aldu de los autores, pero unifícalos y da sentíu a la obra la orixinalidá a la d’abordialos, l’humor y la ironía que trescalen bien d’ellos, la curiosura estilística y l’enfotu lliterariu que s’aprecia en toos. Publicáu por Ediciones La Semeya en 2024, «Trés pates pa un tayuelu» preséntase esti vienres 3 d’ochobre nel local de l’asociación cultural «El Llavaderu» de La Pola Siero.