El plazu pa inscribise ta abiertu hasta'l día 22 d'ochobre
02 oct 2025 . Actualizado a las 12:45 h.La Oficina de Normalización Llingüística del Conceyu de Xixón espublizó les bases y abrió les inscripciones pa una nueva edición del concursu «Xixón fala en 3», con plazu pa inscribise hasta'l próximu día 22 d'ochobre. Con ello, vuelve una de les propuestes más conocíes de la Oficina de Normalización Llingüística de Xixón.
«Xixón fala en 3» consiste nuna competición, íntegramente n'asturianu, onde se va presentar un tema, una idea, una investigación, un proyectu, un problema social, etc. con rigor y cola mayor calidá llingüística posible énte un públicu ensin especializar, xeneralista y variáu. Namás van poder presentase persones mayores d'edá con esplicaciones comunicatives curties de calter diversu y que respuendan al oxetivu del concursu.
El concursu tien tres premios: 850€ al primer clasificáu/ada, 425€ al segundu/a y 225€ al terceru/a en caúna de les dos categoríes esistentes. La primer categoría va centrase en temes venceyaos a la cultura y la realidá asturiana, como antropoloxía, toponimia, baille, hestoria... D'otra banda, la segunda categoría va centrase en temes de divulgación non rellacionaos con Asturies, como por exemplu la esistencia de vida n'otros planetes, el cambiu climáticu...
D'esta manera vuelve un concursu que llegó a la so quinta edición nel añu 2023 y, tres un parón en 2024, vuelve agora esti añu pa poner a prueba la oratoria y desenvolvimientu frente al públicu de les persones asturfalantes.