La banda asturiana fai la presentación oficial del so discu nuevu, Barro, esti vienres 10 d'ochobre na sala Albéniz de Xixón
06 oct 2025 . Actualizado a las 11:52 h.Alberto & García estrenen discu na so tierra y lo faen en Xixón encargaos d'inaugurar Directos Vibra Mahou n'Asturies.El conciertu de la banda va tener llugar na sala Albéniz de Xixón esti vienres 10 d'ochobre. El so combu sónicu ye puru mestizaxe: un colax d'influencies pasaes pol cribu llatinu, un toquecito d'eletricidá y unes lletres que van dereches al corazón. Suenen a fiesta seria, con un toque asturianu bien suyu. En directu tiren de galones y esperiencia y, anque trates d'aguantate, saquen a rellucir el to llau más bailongu. Díes enantes d'esa defensa de la so música en Xixón, falamos con ellos.
—Estrenásteis nuevo discu esti pasáu 26 de setiembre ¿Cómo naz esti Barro? ¿Qué queríeis cuntar o esplorar musicalmente con él?
—Empezamos a preparar esti discu va aproximao un añu y mediu. Nél tán les vivencias d'esa dómina. Musicalmente siguimos teniendo dos pilares fundamentales que son el pop-rock y el folclor (sobre manera d'influencia llatinoamericana).
—¿Cómo foi tol procesu de producción?¿Qué cambia dende La herida, el vuesu anterior trabayu?
—Camudamos la manera d'enfocar la preproducción del discu. Nesta ocasión, Toni Brunet, el nuesu productor, vieno en delles ocasiones equí a Asturies p'armar los temes con nós. Y anque lo atamos too bastante, dexamos un güecu pal xuegu, la improvisación y lo que puediera surdir nel estudiu.
—Con 6 discos d’estudiu a les espaldes ¿Diríeis qu’esti discu representa una evolución o una vuelta a los vuesos raigaños?
—Queremos pensar que ye una evolución del nuesu estilu o la nuesa manera de facer. Intentamos facer les coses lo meyor que podemos y sabemos en cada momentu y tamos convencíos de qu'esti ye'l meyor discu que tenemos hasta la fecha.
—Na vuesa música axúntense ritmos del folclor llatinoamericanu, del pop-rock clásicu, o de la lletrónica pero, ¿integráis tamién la tradición asturiana nes vueses creaciones?
—Quiciabes non explícitamente, pero cualesquier qu'escuchara la nuesa música, viera los nuesos videoclips o viniera a unu de los nuesos conciertos sabe que tenemos l'asturianía bien en vena. Per otru llau, el folclore llatinoamericanu tien más coses de mancomún col asturianu de les que lo dixebren. Amás, equí n'Asturies hai una vinculación bien fuerte con esa tierra por tola hestoria de migración col continente. Hai muncha música d'ida y vuelta que pa nós ye tamién un patrimoniu propiu.
—Nesti discu cuntáis con collaboraciones de lluxu, como les del Quique González, Guada o Martín Bruhn, ¿con qué artista vos prestaría collaborar en futuros proyectos?
—Les nueses collaboraciones parten de l'almiración previa y d'una relación personal cola xente cola que nos xuntamos. Teniendo esa premisa, hai una infinidá d'artistes a los qu'almiramos fondamente, y qu'amás sentimos cercanos colos que taríamos encantaos de collaborar.
—El 10 d’ochobre volvéis a tocar en casa, en Xixón, dientro del ciclu Vibra Mahou. ¿Qué significa pa vosotros tocar n’Asturies?
—Siempres ye mui emocionante y siempres nos pon un pocu más nerviosos qu'en cualesquier otru sitiu. Tenemos la fortuna de viaxar a munchos llugares colos nuesos cantares y siempres queremos facelo perbién. Pero en casa, más si se pue. Amás, el conciertu del vienres 10 na sala Albéniz ye la presentación oficial del discu, asina qu'esi día va ser, de xuru, bien especial.
—¿Qué puede esperar el publicu que vaya a vevos al Teatru Albéniz? ¿Va a haber sorpreses o collaboraciones?
—Nun confirmamos nin desmentimos nada. Lo que sí podemos dicir ye que vamos tar al altor que la ocasión merez y que van salir contentos.
—Dende qu’algamarais en 2013 el premiu primer La Removida de RNE pasaron yá bastantes años, ¿qué vos motiva a siguir faciendo música xuntos?
—La pasión. Na anterior xira arrancábemos los conciertos con una llocución de la película de Campanella «El secreto de sus ojos» que precisamente fala d'eso: Unu puede cambiar de too: de cara, de casa, de familia, de pareya, de relixón, de Dios...pero nun puede camudar de pasión.Tenemos pasión por esto.