L'Academia de la Llingua Asturiana reclama la rectificación del Real Decretu de la Secretaría Xeneral d'Universidaes
AGORA
La institución denuncia la situación arrequexada de la Filoloxía Asturiana nesti decretu
07 oct 2025 . Actualizado a las 11:48 h.L'Academia de la Llingua Asturiana (ALLA) espresó esti llunes el so contundente refugu al proyectu de Real Decretu del Ministeriu de Ciencia, Innovación y Universidaes, al considerar qu'esclúi la Filoloxía Asturiana de los ámbitos y especialidaes reconocíes nel ámbitu universitariu.
Per aciu un comunicáu, l'ALLA detalla que'l borrador del decretu de la Secretaría Xeneral d'Universidaes inclúi, ente los ámbitos de conocencia, les filoloxíes Española, Catalana, Gallega, Vasca y les Clásiques, pero omite la Filoloxía Asturiana. Por mor d'esto, les y los profesores dedicaos a estudios filolóxicos asturianos namás podríen adscribirse a un espaciu xenéricu —el de Llingües Modernes y les sos Lliteratures—, perdiendo la reconocencia específica que tienen otres filoloxíes.
Nel apartáu d'especialidaes (que definen el perfil docente ya investigador de les places universitaries), el proyectu menta «Llingua y Llingüística Española, Gallega, Catalana y Vasca» y les sos lliteratures, ensin aludir nin a la llingua nin a la lliteratura asturiana. L'ALLA considera qu'esta omisión desdibuxa la identidá del profesoráu asturianu y configura una discriminación «inaceptable».
L'Academia recuerda que la Filoloxía Asturiana llogró mientres les últimes décades un desenvolvimientu académicu respondíu pola ANECA, con iniciatives como'l Mínor d'Asturianu nos graos de Filoloxía, la mención de Llingua Asturiana nel Grau de Maxisteriu d'Educación Primaria, y la especialidá de Llingua Asturiana nel Máster de Formación del Profesoráu d'Educación Secundaria.
Por tanto, la ALLA esixe una corrección al decretu pa que la Filoloxía Asturiana seya reconocida n'igualdá de condiciones coles demás filoloxíes estatales. Tamién solicita al Rectoráu de la Universidá d'Uviéu y a les conseyeríes asturianes d'Educación, Cultura y Universidaes qu'adopten la mesma postura de reclamación. L'Academia anunció que va presentar esti pidimientu directamente a les autoridaes polítiques y universitaries, tanto autonómiques como estatales.