El primer premiu pal equipu vencedor ta dotáu con 2500 euros y el premiu individual va consistir nun viaxe a EEXX pa participar nel Richi Entrepreneur Boston Immersion Program
08 oct 2025 . Actualizado a las 12:17 h.La Universidá d'Uviéu, en collaboración cola Fundación Banco Sabadell, l'Asociación TFCOOP y O4IMPACT, va celebrar el 9 y 10 d'ochobre la cuarta edición de la Hackathon TalentUO, un eventu que busca fomentar la innovación, el trabayu n'equipu y la conexón ente'l talentu universitariu y l'entornu empresarial.
Mientres dos xornaes, la Facultá de Xeoloxía va acoyer a estudiantes de distintes titulaciones que van trabayar n'equipos multidisciplinares pa dar respuesta a retos reales plantegaos por empreses collaboradores, enmarcaos nos Oxetivos de Desenvolvimientu Sostenible (ODS) y coles mires de xenerar un impactu positivu na sociedá.
Nesta edición, van participar cinco empreses que van plantegar los sos propios desafíos d'innovación: Amazon, Windar Renovables, Inetum, Lessthan3 y Agrolinera. Caúna d'elles va presentar un retu alliniáu colos ODS, ufiertando a los universitarios la oportunidá d'aplicar les sos conocencies, creatividá y visión crítica pa proponer soluciones concretes.
La Hackathon TalentUO consolídase como un puntu d'alcuentru ente estudiantes y el texíu empresarial, impulsando'l desenvolvimientu de competencies clave pa la empleabilidá, la innovación y l'emprendimientu. Al traviés del trabayu conxuntu con profesionales de distintos sectores, los participantes van poder conocer de cerca les demandes reales del mercáu llaboral y potenciar el so desenvolvimientu profesional.
L'apertura oficial de la Hackathon va cuntar cola participación d'Alfonso López Muñiz, vicerrector d'Estudiantes y Empleabilidá, y representantes de la Fundación Banco Sabadell y O4IMPACT, xunto a una ponencia inspiracional al cargu de un referente del ámbitu emprendedor, Pablo López García, CEO de Betterplace. Darréu, les empreses van presentar los sos retos a los equipos d'estudiantes, que van disponer de dos díes pa desenvolver les sos propuestes, col acompañamientu de mentores de la Fundación Banco Sabadell.
L'eventu va rematar cola presentación de les soluciones énte un xuráu formáu por Cristina Fanjul, directora del CEEI; Zafira Castaño, presidenta y Cofundadora de IMFAHE, Roberto Bayón, Pau Gimeno, fundador del Centru Richi (Boston) y Susana Pérez López, directora del área d'Empleabilidá y Emprendimientu de la Universidá d'Uviéu. El premiu grupal va ser de 2500 euros y va concedese un premiu individual, d'un viaxe a Boston pa participar nel Richi Entrepreneur Boston Immersion Program.