L´eventu, con sede n´Avilés, va desenvolvese mientres los díes 17, 18 y 19 d´ochobre nel Palaciu del Marqués de Camposagrado
09 oct 2025 . Actualizado a las 13:37 h.Avilés va acoyer los díes 17, 18 y 19 d'ochobre la primer edición de Festillingües, un alcuentru cultural que va tresformar el Palaciu del Marqués de Camposagrado nun espaciu vivu onde les llingües y les cultures van atopase, van dialogar y van celebrase. Mientres trés intenses xornaes, el festival va convidar a reflexonar sobre la riqueza del plurillingüismu y a esfrutar d'actividaes pensaes pa tolos públicos: dende conferencies y meses redondes hasta conciertos, talleres y espectáculos al aire llibre.
El vienres va ser la xornada d'apertura y va tar marcáu pola reflexón y l'alderique. Espertos de distintos ámbitos van abrir el programa con una charra sobre'l papel de la intelixencia artificial na preservación de les llingües minoritaries, a la que van siguir meses redondes sobre la tresmisión interxeneracional y la creación artística n'idiomes en riesgu. La música, siempres presente como vehículu cultural, va protagonizar una conferencia sobre la so relación coles llingües minorizadas. Pela tarde, el públicu va poder percorrer el Mercáu de les Llingües y les Cultures, un espaciu que va axuntar a asociaciones, editoriales y empreses culturales, y esfrutar de talleres de diversidá llingüística, intervenciones artístiques na cai y un recital poéticu y musical nel que les llingües van entellazase sobre l'escenariu.
El sábadu'l festival va abrise a esperiencies más vivenciales. Dende primer hora de la mañana, un conciertu didácticu va llevar a los asistentes a un viaxe al traviés de los preseos del mundu, siguíu d'espectáculos d'improvisación y monólogos que van amosar cómo l'humor tamién puede ser una ferramienta de normalización llingüística. La llingua y el territoriu van xunir nun taller de toponimia y una visita empuesta pola contorna d'Avilés, que van poner en valor la relación ente les pallabres y los paisaxes que les inspiren. Al anochecerín, el Palaciu va convertise n'escenariu de la gran Folixa de Les Llingües y Les Cultures, cola participación d'un grupu asturianu y otra banda convidada d'una comunidá llingüística distinta. Va ser un conciertu festivu y collaborativu nel que les músiques y les lliteratures van cruciase como símbolu d'unión.
El domingu, pensáu especialmente pa les families, va ufiertar propuestes participatives y cercanes. Va Haber cursinos exprés p'aprender de manera amena los rudimentos de distintes llingües y cuentacuentos n'asturianu pa los más pequeños. El festival va despidise cola tradicional Espicha del Mundu, un zarru gastronómicu y musical que va sirvir pa celebrar lo compartío mientres la fin de selmana y brindar poles cultures y llingües qu'arriquecen la nuesa sociedá.
Festillingües quier asitiar a Avilés nel mapa de los grandes alcuentros culturales internacionales. En palabres del so director, Inaciu Galán, «la diversidá llingüística ye una riqueza que tenemos de protexer, y Festillingües naz pa ser un llugar d'alcuentru, celebración y visibilidá, con Avilés como escenariu privilexáu».
La presentación oficial de Festillingües va ser el miércoles 15 d’ochobre na Casa Conceyu d’Avilés a les 11:30 hores, cola presencia del director, Inaciu Galán, y la conceyala de Vivienda, Consumu, Memoria Democrática y Normalización Llingüística, Ana Purificación Solís Roza. El Festillingües tien una ayuda del Ministeriu de Cultura pa la promoción de la lectura, mesmo que del propiu Gobiernu d’Asturies, y cuenta cola collaboración del Conceyu d’Avilés.