La Conseyería de Cultura y la ESCAC llancen dos cursos gratuitos pa impulsar el sector audiovisual asturianu
AGORA
La Llaboral va acoyer formaciones n'Ayudantía de dirección y Doblaxe ADR p'actores
14 oct 2025 . Actualizado a las 05:00 h.El talentu audiovisual asturianu suma un nuevu impulsu gracies a la collaboración ente la Conseyería de Cultura, Política Llingüística y Deporte del Principáu d'Asturies y la Escola Superior de Cinema i Audiovisuals de Catalunya (ESCAC), una de les instituciones cinematográfiques más prestixoses d'Europa. Dambes entidaes xunieron fuerces pa ufiertar, de forma gratuita, dos cursos especializaos empobinaos a profesionales y aspirantes del sector audiovisual, que se van desenvolver ente ochobre y payares en Llaboral Ciudá de la Cultura, en Xixón.
L'alcuerdu, robláu pola conseyera Vanessa Gutiérrez y la responsable del programa OFF ESCAC, Gloria Vidal, va dexar que l'alumnáu asturianu acceda a una formación altamente técnica y práctica, diseñada p'ameyorar les competencies profesionales en distintes fases del procesu cinematográficu. Les formaciones, basaes nel sistema de microcredenciales, van tar subvencionaes al 100% y van otorgar seis creitos ECTS, xunto cola certificación oficial d'ESCAC, aval reconocible nel ámbitu audiovisual nacional ya internacional.
El primeru de los cursos, Ayudantía de Dirección: Movie Magic Scheduling, va celebrase del 31 d'ochobre al 29 de payares y va tar impartíu polos directores y ayudantes de dirección Isabel Ayguavives, de Galicia, y Samu Fuentes, d'Asturies. La formación, de 45 hores de duración, va desenvolvese los vienres pela tarde y los sábados pela mañana na Llaboral, y va centrase nel aprendizaxe prácticu de ferramientes y métodos esenciales pa planiar un rodaxe, dende la llectura del guion hasta la ellaboración del plan de trabayu. Solo venti persones van poder participar nesti cursu, que promete averar la metodoloxía profesional de los grandes rodaxes a la redolada asturiana.
Nel mes d'avientu va abrise una segunda convocatoria dedicada al Doblaxe ADR p'actores, entamada en collaboración col estudiu La Habitación con una Cama, especializáu en composición y producción musical, doblaxe y llocución, fundáu pol compositor y realizador Mario Viñuela y l'actriz y locutora Elena Silva. Esta formación busca reforzar la profesionalización d'intérpretes nun ámbitu cada vez más demandáu dientro de la industria audiovisual.
La iniciativa enmárcase dientro del programa OFF ESCAC, creáu en 2025 col sofitu del Ministeriu de Cultura, el ICAA y los fondos europeos Next Generation. Esti programa naz col propósitu d'averar la formación audiovisual a tou tipu de perfiles, facilitando itinerarios flexibles y accesibles pa quien busque especializase n'árees técniques concretes. Con más de trés décades de trayectoria, la ESCAC figura ente les 15 meyores escueles internacionales de cine según The Hollywood Reporter y formó a dalgunos de los nomes más destacaos del cine español contemporaneu.