Emerxentes, el festival de música y artes plástiques de la escena emerxente asturiana celebra una nueva edición ente Xixón y Uviéu

El Festival Emerxentes, una de les cites más singulares del panorama cultural asturianu, celebra la so tercer edición los próximos 1 y 2on una propuesta que va volver xunir música en directu, artes plástiques y creatividá emerxente nun formatu partíu entre Xixón y Uviéu. de payares c

Consolidáu n'apenes trés años como xuna plataforma esencial pa la escena alternativa asturiana, l'eventu busca dar visibilidá a artistes nuevos y multidisciplinares, fomentando la collaboración ente músicos, ilustradores y pintores, y promoviendo una nueva manera d'entender l'arte local: más cercana, participativa y contemporanea.

El festival va arrancar el sábadu 1 de payares na Sala Acapulco (Xixón) con una intensa velada dedicada al rock y indie-rock. A partir de les 19:00 hores, el públicu va poder esfrutar de los conciertos de Triple Malta, Bisonte y Los Acebos, trés bandes que representen la enerxía creativa y la diversidá estilística de la nueva xeneración musical asturiana.

Amás de los directos, la xornada va cuntar con una esposición conxunta del pintor David Marcos Elena y la ilustradora Amanda Moriyón, dos artistes mozos con estilos mui personales que dialoguen ente'l color, la introspección y los raigaños culturales asturianos. Dambos van tar presentes con un pequeñu market artísticu, onde'l públicu va poder adquirir obra orixinal y conocer el so procesu creativu.

Ente conciertu y conciertu, l'atmósfera sonora va tar a cargu del DJ Guille Díaz, nuna nueche que busca romper col formatu tradicional de los conciertos pa tresformase nuna esperiencia inmersiva y multisensorial. Les entraes pa esta xornada tienen un preciu de 10 euros en venta anticipada y 12 en taquilla.

El domingu 2 de payares, el festival va treslladase a Uviéu, onde l'Estudiu Flechazu va acoyer una sesión vespertina más íntima y delicada, centrada nel pop d'autor. Dende les 16:30 hores, van actuar Eli Barahona y Antonio Irún y Los Lobos, dos propuestes que destaquen pola so sensibilidá y el so enfoque personal del cantar.

L'espaciu volverá vistise coles obres de Marcos Elena y Moriyón, que van acompañar visualmente los conciertos cola so esposición. Les entraes pa esta segunda xornada cuesten 4 euros anticipaes y 5 en taquilla.

Creáu en 2023, el Festival Emerxentes nació cola vocación de mover la escena cultural asturiana, promoviendo la collaboración ente disciplines y animando a empreses ya instituciones a implicase nel desenvolvimientu del texíu artísticu local. Nes sos trés ediciones, el proyectu impulsó vermús culturales, micros abiertos, esposiciones y charres, consolidándose como un espaciu d'alcuentru y esperimentación pa les nueves xeneraciones de creadores. Anguaño, una de los promotores del festival forma parte del comisariáu de la candidatura d'Uviéu a Capital Europea de la Cultura 2031, representando los intereses de la mocedá asturiana nesi procesu.

---

---