Nel actu presentóse la edición de les obres ganadores y de les cinco finalistes
15 oct 2025 . Actualizado a las 05:00 h.El sábado 11 d’ochobre celebróse nel auditoriu de La Pola Siero l’acutu d’entrega de premios del II Concursu Internacional de Composición Coral qu’organiza la sociedá Siero Musical d’esa villa. Esta entidá, que l’añu pasáu cumplió cien años puxando pola educación musical y la so práctica, entama añalmente esti certame col enfotu de favorecer la creación de música coral y contribuyir a enanchar el repertoriu coral d’Asturies. Nesta edición presentáronse 22 obres procedentes de varies comunidaes autónomes y de dellos países hispanoamericanos, siendo les ganadores dos composiciones n’asturianu: el primer premiu foi pa «Sele», con lletra y música de María Díaz Megido, y el segundu pa «Nun-yos tengas perceguera», una composición d’Íker González Cobeaga a partir del poemariu del mesmu nome de Sidoro Villa Costales.
Nel actu, amás de la entrega de premios, presentóse la edición de les obres ganadores y de les cinco finalistes y, darréu d’ello, el coru Ángel Émbil d’esta sociedá, dirixíu nesti casu polos sos respectivos autores, interpretó entrambes pieces nun curtiu pero memorable conciertu.