Esti pasáu vienres Alberto & García xubíeronse a les tables del Teatru Albéniz de Xixón de la mano de Vibra Mahou pa estrenar discu. Los asturianos llegaron col so mestizaxe musical a presentar en casa Barro, el so sextu discu d’estudiu.
El grupu fíxose un poco de rogar, pasaben quince minutos de les 21h cuando entamaron a sonar les primeres notes de Reina de la selva, cantar qu’abrió el show. Con un publicu entregáu dende l’entamu, comenzaron a desgranar los temes del so nuevu álbum. Empecipiaron con Camaleón, pa seguir con La Capital, Meteorito, Trece, El Pantano y Champán.
Darréu, foron alternando temes de discos anteriores como La herida col restu de temes que presentaben, dalgunos interpretaos per primer vegada en directu. Hubo tiempu inclusive pa les versiones, dende un Fruta fresca de Carlos Vives interpretáu por Manu García, saxo de la banda, a una versión blues del Piensa en mí de Luz Casal que foi un regalu pa los oyíos. Siguieron de Procesión a C’est fini pasando per Pañuelito Blanco, Gengis Khan y Barro, repasando toles del pistes del LP. Y fixeron imposible aparar de mover los cadriles con Como John Wayne y Paloma blanca.
Con un soníu escelente y bien equilibráu, el quintetu foi saltando ente’l boleru, el pasudoble o’l ritmu más indie hasta llegar a Tonada del Bosque, cantar col que amagaben la despidida. Tres unos cuantos “otres trés” d’un Teatru Albéniz encendíu, la banda volvió pa, esta vegada sí, despidise per tolo alto: Avalancha y Río Bravo dieron pasu a Calavera y asina, a ritmu de cumbia, Alberto & García poníen el ramu a una nueche bien cálida y que nos fixo esfrutar como perrinos xugando nel meyor Barro.