El Círculo Gijón Baloncesto amuesa'l so apoyu a la visibilización de la llucha contra'l cáncanu de mama
AGORA
Los xugadores del equipu van llucir calcetinos roses nel partíu d'esti domingu contra'l Biele ISB d'Iraurgi como xestu d'apoyu a esta causa
19 oct 2025 . Actualizado a las 05:00 h.El día 19 d'ochobre de cada añu la color rosa garra un significáu mui especial. Trátase de la fecha establecía pola Organización Mundial de la Salú (OMS) como Día Mundial contra el Cáncanu de Mama, una efeméride dedicada a la concienciación sobre esta enfermedá, n'especial tocantes la prevención y el diagnósticu tempranu. L'equipu del Círculo Gijón Baloncesto súmase a la campaña de sensibilización global llanzando una llinia de calcetos roses en collaboración con Wibo, la marca que viste oficialmente al conxuntu xixonés. El partíu del domingu contra l'equipu vascu Iraurgi Saski Baloia - Biele ISB, que coincide cola fecha señalada, va ser l'escaparate qu'aproveche l'equipu pa volver otru añu más a amosar el so apoyu nesta llucha.
Los datos del cáncanu de mama n'Asturies
Un total de 881 muyeres fueron diagnosticaes de cáncanu de mama nel 2024, de les qu'aprosimadamente un 20% yeren menores de 50 años. En rellación a estos 881 nuevos casos, 350 persones pasaron pelos servicios de l'Asociación Española contra'l Cáncanu n'Asturies, ente enfermes y familiares. A les persones allegaes «ye importante dirixinos porque son un sustentu, un valor fundamental nel procesu d'acompañamientu». Según Julio González Zapico, vicepresidente de l'asociación mencionada, calcúlase qu'ún de cada dos homes van sufrir dalgún tipu de cáncanu a lo llargo de la so vida y nel casu de les muyeres, una de cada trés. Pero tamién hai númberos pa la esperanza. El casu concretu del de mama tien una supervivencia media a cinco años del 85,5%.
El cáncanu de mama nel Estáu español
Calcúlase que, n'España, con cifres al rodiu de los 35.000 diagnósticos cada añu, ye'l tipu de cáncanu que más se da ente les muyeres per delantre d'otros como'l d'úteru, pulmón y ovariu. En términos aprosimaos, estímase qu'un 30% de tolos cáncanos diagnosticaos a nivel estatal son de mama. Gracies a la investigación y a los avances nos últimos años, anguaño'l porcentaxe de persones que superen la enfermedá nel espaciu de cinco años yá supera'l 80%. Sicasí, hai que dase cuenta de que tovía se trata d'una enfermedá non resuelta na so fase metastásica (esto ye, cuando'l cáncanu espárdese a otres partes del organismu), y qu'hasta un 30% de pacientes con un diagnósticu tempranu va tener una recaída con metástasis hasta dellos años depués de rematar los tratamientos. Na actualidá entá un 5-6% de tolos cáncanos de mama diagnostíquense na fase metastásica. D'otra banda y pesie a los avances técnicos y el bon facer del personal sanitariu, l'acción o inacción política resulta decisiva y esti mesmu añu saltaba l'escándalu pola situación na comunidá d'Andalucía, onde la crisis de les mamografíes amuesa la importancia d'un serviciu de prevención que nun escatime al serviciu de la población.
La magnitú mundial del problema
Nel 2022, diagnosticáronse en tol mundu 2,3 millones de casos de cáncanu de mama en muyeres y rexistráronse 670.000 fallecimientos por esa enfermedá. Éstos son los datos oficiales d'hai trés años y l'actualidá siguen nuna llinia asemeyada. El cáncanu de mama afecta a muyeres de cualquier edá a partir de la pubertá, en tolos países del mundu, pero les tases son mayores ente les muyeres adultes. Les estimaciones mundiales revelen grandes desigualdaes na carga de mortalidá función del grau de desenvolvimientu humanu. Por casu, en países con un índiz de desenvolvimientu humanu (IDH) bien altu, estímase que va diagnosticase cáncanu de mama a una de cada 12 muyeres nel cursu de la so vida, y una de cada 71 muyeres va morrer por esa enfermedá.
Pequenos xestos que sumen resultaos
La prevención y el tratamientu del cáncanu de mama ye un imperativu social y cada granín d'arena val. L'equipu del Círculo Gijón Baloncesto amuesa con esti xestu'l so compromisu dando visibilidá a esta causa, nesti casu compartiendo'l mensaxe en tierres vasques nel partíu contra l'equipu Iraurgi Saski Baloia (Biele ISB) d'esti mesmu domingu 19. L'acción del equipu fadráse pública tamién nos canales oficiales de la FEB y nes sos redes sociales. Cada xestu d'apoyu y cada campaña sumen nuna llucha d'estes dimensiones y gravedá. La sociedá ta caldía más concienciada y hai que siguir trabayando.
Datos: Organización Mundial de la Salú (OMS) y portal Astursalud del Serviciu de Salú d'Asturies.