Un triple reconocimientu que «ayuda enforma, reforcia'l posicionamientu estratéxicu del hospital y fáilu atrayente pa les nueves xeneraciones de profesionales», declaró la xerente del hospital
17 oct 2025 . Actualizado a las 23:09 h.«Tamos bien arguyosos y contentos. Ye un reconocimientu al llabor que faen los nuesos profesionales. Ye un estímulu pa siguir meyorando, que ye'l nuesu deber y obligación». Asina valoraba ayeri Marisa Sánchez, xerente del Hospital de Cabueñes, el gallardón nos Premios Hospitales Top 20 nel área d'atención al paciente críticu nel serviciu de Medicina Intensiva, la unidá de coronaries y la UVI de Neonatos, un reconocimientu a nivel estatal que destaca la escelencia y compromisu de los profesionales de la salú. De los 190 hospitales participantes, namás qu'ocho centros fueron escoyíos como finalistes y el de Cabueñes foi l'únicu centru sanitariu asturianu qu'optó a premiu.
«Creo que nestos servicios, el puntu fuerte ye'l mesmu que tien tol área. Cuntamos con profesionales altamente cualificaos y con alto sentíu de pertenencia. Esti ye una área sanitaria na que se sienten los sos colores», destacó la xerente. «Caracterizámonos por tener un altu nivel d'escelencia na atención qu'ufrimos, tanto na actividá preventiva, como rehabilitadora o como asistencia sanitaria directa o paliativa», añedió. Trátase d'un área «con muncha población, ritmu y bien dinámico», poro, dientro d'esti dinamismu que tien l'hospital, «premios como esti dannos la razón en qu'hai un altu nivel de calidá», señaló arguyosa. Y añedió, sicasí: «Nun vamos conformanos, vamos siguir pa facelo tolo meyor que se pueda. Nós nun tenemos barreres, el nuesu llistón ye ser los meyores». Esti premiu, xunta les declaraciones de la xerente, supón tamién ye un emburrión motivador pa la xente nuevo y el talentu emerxente. «Ayuda enforma. Reforcia'l posicionamientu estratéxicu del hospital y fáilu atrayente pa les nueves xeneraciones de profesionales».
Isabel González Fouces, directora del hospital, recoyó'l premiu nun eventu celebráu nel espaciu Pablo VI del paséu de Juan XXIII de Madrid. Nesta xornada, participó tamién Laura Gutiérrez, viceconseyera de Sanidá y directora del Serviciu Madrilanu de Salú, y Rafael Bengoa, exconseyeru de Salú y exdirector de Sistemes de Salú na Organización Mundial de la Salú (OMS). Estos reconocimientos, entregaos pola empresa IQVIA dende 2020, valoren los meyores resultaos en xestión y atención médica d'hospitales públicos y privaos de toa España. El programa evalúa patrones de bones práctiques y concede los premios basándose en criterios como la xestión hospitalaria global y árees específiques.