El festival Artístiques entama la primer muestra d'asturianada actual y música electrónica

Va unos díes Puru Remangu y Ixuxú Cultura anunciaron el programa completu d’Artístiques, un festival que’l 29 de payares va axuntar nos Kuivi Almacenes d’Uviéu artes escéniques, música y artes plástiques y que ta caracterizáu por que toles artistes participantes son muyeres xóvenes qu’usen la llingua autóctona del so territoriu como idioma d’espresión. La creación d’obres inédites ye otra de les señes d’identidá del proyectu y dientro d’esto enmárcase lo que la organización presenta como la 1er Muestra d’Asturianada Electrónica.

L’asturianada ye’l xéneru musical más identitariu d’Asturies y dellos espertos na materia coinciden en sorrayar que dalgunos de los problemes más importantes a los que s’enfrenta son la falta de relevu xeneracional y la «caducidá» nes lletres, que cuasi nun s’actualizaron dende los tiempos de la revolución industrial. Pa dar respuesta a esto, Artístiques encargó la creación d’un total de seis pieces inédites a cantadores, productores de música electrónica y escritores. Un resultáu que va poder sentise nesta muestra que tien por oxetivu actualizar los mensaxes de la tonada, despertar l’interés por el xéneru nos públicos xóvenes, fomentar el relevu xeneracional nos escenarios y sofitar la creación lliteraria.

Les cantadores Alicia Villanueva (Bimenes, 2000) y Lucía Rojo (Mieres del Camín, 2002), son les protagonistes d’esta muestra. La yerbata arrodióse de la producción musical del destacáu dúu d’electrónica de raigañu Llevólu’l Sumiciu y de les lletres de la escritora renovadora de la lliteratura xuvenil n’asturianu Blanca Fernández (Bimenes, 1994). Cola mierense andecharon el productor Fruela 757 -pioneru n’amestar música popular asturiana y soníos urbanos-, la premiada escritora y música Marina Pangua (Uviéu, 1992) y la reconocida poeta y tamién música Ánxela Gómez d’Ávila (Avilés, 1991). Villanueva y Rojo tamién escribieron una de les trés lletres que van interpretar caúna con unes temátiques que xiren al rodiu la fi losofía del festival: mocedá, feminismu y diversidá llingüística.

Dende Artístiques van dir dando más información de les distintes obres que se tán creando a costa fecha pa esti festival, anque yá avanzaron la programación completa. La estaya musical fórmenla esta 1er Muestra d’Asturianada Electrónica y los conciertos en gallegu de Catuxa Salom y n’euskera de Süne. La estaya d’artes escéniques fórmenla les actuaciones de danza de Xana Llaneza; el monológu poéticu-escénicu de Paula Mata; el microteatru de la estudiante de la ESAD (Escuela Superior de Arte Dramático) Carmen Capellá; y la performance de les tamién alumnes de la ESAD Adriana Yáñez, Nora Junquera y Julia Azcano. Na estaya d’artes plástiques van crear una obra en vivo les artistes María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero y les estudiantes de la ESAPA (Escuela Superior d’Arte del Principáu d’Asturies) Raquel Mañana y de la Escuela d’Arte d’Uviéu Lucía Álvarez. Too esto va poder vese’l sábadu 29 de payares dende les 19h nos Kuivi Almacenes y con entrada de baldre.

---

---