El FICX presenta cuartu 207_, una reflexón sobre la esistencia del cine asturianu, del director Tito Montero
AGORA
La obra de Tito Montero, proyectada na sección Pases Especiales, retoma l'esperimentu d'Hotel Asturies p'afondar nel alderique sobre la identidá, la clase y la mirada d'una cinematografía propia
23 oct 2025 . Actualizado a las 14:14 h.El 63º Festival Internacional de Cine de Xixó (FICX) anuncia la proyección, dientro de la so programación de Pases Especiales, de cuartu 207_, el nuevu llargometraxe documental de Tito Montero. La película álzase como una necesaria secuela y meditación espandida sobre l'alderique empecipiáu por Ramón Lluís Bande en 2019 con Hotel Asturies. Mesmo qu'aquel antecedente, cuartu 207_ ye una producción de De La Piedra Producciones.
cuartu 207_ nun ye solo un documental, sinón un dispositivu cinematográficu y una esploración filosófica sobre la construcción d'una identidá fílmica. La película axunta a doce cineastes asturianos que vieron proyectaes les sos obres na 62ª edición del FICX, confinaos na habitación 207 del Hotel Asturies pa reflexonar, en soledá y frente a la cámara, sobre la esistencia del cine del país. El proyectu, impulsáu en 2018 por Ramón Lluís Bande, asítiase na máxima filosófica de Theodor W. Adorno: «l'arte namás ye en relación col so otru; l'arte ye pleitu contra'l so otru».
Tito Montero retoma l'esperimentu guiau pola idea de que la esistencia d'una cinematografía propia namás puede dase si facer frente a otres, o como postula'l mesmu Montero, nun pleitu constante contra'l conceutu del otru cine español.
Pa esta segunda entrega, el panel de cineastes compuestu por Pablo Casanueva, Maryam Harandi, Diego Flórez, Omar Tuero, Ana G. Argüelles, Álex Galán, Howi Álvarez, Antonio Llaneza, Alicia Moncholí, Manuel García Postigo, Sergio Montero y Ramón Lluís Bande enfréntense a trés preguntes catalizadores:
- Territoriu y Paisaxe: ¿Qué papel xuega Asturies como suxetu políticu/históricu y comunidá humana nel cine?
- Mirada Cinematográfica: ¿Puede esistir una mirada cinematográfica asturiana al mundu y, de ser asina, cómo ye?
- El testu de sofitu sobre la mesa de rodaxe ye El docudrama, fronteres de la ficción de Javier Maqua, señalando l'interés por espandir les fronteres del relatu.