L'artista visita Uviéu esti 8 de payares dientro de los Directos VIbraMahou
31 oct 2025 . Actualizado a las 05:00 h.La Bien Querida llega a Uviéu'l próximu 8 de payares pa ufiertar unu de los conciertos más esperaos del ciclu Directos VibraMahou, una cita que promete enllenar de pop melódicu, emoción y lletres afilaes el corazón de la ciudá. Ana Fernández-Villaverde, alma y voz del proyectu, aterriza cola elegancia y el magnetismu que la convirtieron nuna figura imprescindible de la escena indie española. Ente sintetizadores, guitarres y una sensibilidá única, la so música sigue esplorando los clarescuros del amor y la vida cotidiana, conquistando a nueves xeneraciones d'oyentes. Enantes de la so actuación, charramos con ella sobre la so relación col públicu asturianu, la evolución del so soníu y lo que podemos esperar d'esti nuevu alcuentru en directu.
—Esti 8 de payares presentes LBQ n'Uviéu dientro de los Directos VibraMahou. ¿Qué te fai ilusión d'esta cita y qué conexón tienes col públicu asturianu?
—Va muncho que nun tocamos n'Uviéu, yá nun m'alcuerdo cuando foi la última vegada. Tengo munches ganes d'esta cita. De pequeña venía muncho al muséu de Belles Artes.
—El formatu acústicu convida a una cercanía especial. ¿Qué te gusta de tocar los tos cantares nesta versión más íntima?
—Los mios cantares pueden tocase con banda y en formatu amenorgáu. Vamos afaciéndonos a los espacios y a los ciclos colos distintos formatos. La verdá ye qu'esfruto de toles maneres. N'acústicu'l contactu col públicu ye mayor, diría qu'hai más nervios y hai que tratar de faelo bien pa que'l públicu nun s'aburra.
—LBQ ye un discu que revisita la to carrera con nueves llectures. ¿Cómo foi volver sobro los tos propios cantares col pasu del tiempu?
—Los cantares son toos nuevos. Nun sé lo que pon na nota de prensa, pero son cantares inéditos y nuevos. Ye posible que'l soníu se paeza a los mios primeros discos, pero ye too nuevo.
—¿Hai dalgún tema que cobrara un nuevu sentíu o que redescubrieres al reinterpretarlo pa esti proyectu?
—Toes los cantares son especiales y reflexen el momentu actual nel qu'atopo. Los mios discos son como un diariu pa mi. Cada vez que canto los cantares, nuevos o antiguos, alcuérdome del momentu esactu nel que m'atopaba cuando les escribí.
—Nes tos lletres siempres hai un amiestu de romanticismu, ironía y señaldá. ¿Sigues escribiendo dende los mesmos llugares emocionales que de primeres, o camudó la to forma de cuntar les coses?
—Según vamos creciendo y va pasando'l tiempu, xna va camudando como tou bichu viviente y vamos creando dende distintes etapes vitales. La vida son etapes y cambeos constantes.
—El Bien Querida tien un soníu bien personal, pero tamién bien cambiante. ¿Qué papel xuega la esperimentación na to música?
—Intento buscar soníos nuevos pa motivame y divertime nel procesu de la creación d'un nuevu discu. En LBQ cunté con David Rodríguez como productor, a quien conozo enforma y con quien m'entiendo bien.
—N'Uviéu vas actuar dientro del ciclu VibraMahou, que busca conectar a la xente al traviés de la música en directu. ¿Qué importancia tien pa ti esa relación ente artista y públicu?
—Nuna actuación musical nuna sala siempres hai una interacción ente músicu y públicu bien fuerte. Les persones que xubimos a un escenariu precisamos del calor del públicu pa danos fuerza y seguridá y facelo meyor.
—Dempués de tantos años de carrera, ¿qué te sigue emocionando cada vez que xubes a un escenariu?
—El fechu de que daquién pague pa venir veme yá me paez maraviyosu y siéntome mui agradecida.
—¿Cómo ye'l día ente día d'una xira acústica como esta? ¿Vívese d'una forma distinta a los grandes conciertos con banda?
—Nesta xira d'iviernu pa presentar el nuevu discu y los nuevos cantares compaxino conciertos n'acústicu y con banda. La mayoría son con banda.
—Y mirando al futuru, ¿tienes yá en mente nueves cantares o proyectos dempués de LBQ?
—Yá toi dándo-y vueltes a coses nueves y con munchos proyectos en mente.