Gaiteros del Carbón celebra'l X aniversariu con una campaña de micromecenalgu en Verkami
AGORA
La banda de les cuenques mineres d'Asturies echa a andar un proyectu pa financiar un conciertu especial, una esposición retrospectiva y materiales conmemorativos
30 oct 2025 . Actualizado a las 10:56 h.La banda Gaiteros del Carbón, nacida nes cuenques mineres y referente de la música tradicional asturiana, cumple diez años d’historia y quier celebralo con una propuesta abierta a tol públicu. Al traviés d’una campaña de micromecenalgu na plataforma Verkami, el grupu busca sofitu pa financiar un conciertu d’aniversariu, una esposición que recueya la trayectoria y la creación de productos conmemorativos que mantengan viva la memoria d’esti camín compartíu. «Queremos celebrar estos diez años como se merecen: cola xente que nos acompañó y colo que sigue creyendo na música asturiana», esplica Pablo Carrera, director de la formación.
Dende’l debut en 2016, Gaiteros del Carbón llevó la so música per decenes d’escenarios, feries y festivales, collaborando con artistes como Celtas Cortos, Marisa Valle Roso, Los Berrones o Dixebra. Más allá de la faceta musical, la banda convirtióse nun símbolu del arguyu de les cuenques mineres, del trabayu colectivu y del valor de la cultura como elementu d’identidá.
La esposición conmemorativa va amosar semeyes, indumentaria, instrumentos y recuerdos d’estos diez años, demientres que’l conciertu especial reunirá a la banda al completu con collaboraciones y un repertoriu preparáu pa la ocasión.
Les persones que sofiten la campaña van poder consiguir recompenses esclusives, ente elles el póster del X Aniversariu diseñáu por Sergio Llunik, gorres bordaes y camisetes d’edición llimitada, almanaques, botelles de sidra conmemoratives y productos artesanales creaos pa la ocasión y recompenses especiales con materiales únicos, como’l cascu mineru o’l fatu.
«Facemos un llamamientu a tola xente: ayúdanos a financiar el conciertu y la esposición del nuesu X Aniversariu», resume la banda.