El Muséu del Pueblu d'Asturies recibe la obra gráfica completa del dibuxante y músicu Igor Medio
AGORA
La madre del artista xixoniegu dona más de 1.300 piezas ente bocetos, viñetes y caricatures que yá se dixitalizaron
01 nov 2025 . Actualizado a las 05:00 h.El legáu artísticu del dibuxante de cómic y músicu xixoniegu Igor Medio (fináu’l 24 de xunu de 2006 nun accidente de tráficu xunto al so compañeru de «Felpeyu», Carlos Redondo) guárdase yá nel Muséu del Pueblu d'Asturies, tres la donación realizada pola so madre, Sonia Tuya. El fondu, dafechu dixitalizáu, axunta más de 1.300 pieces ente dibuxos a llápiz, tinta china, cartelos, caricatures y viñetes.
«Absolutamente tolo que fixo, publicao o non, ta equí: bocetos, historietes, obres premiaes y otres non; tola so vida», afirmó Tuya mientres l'actu d'entrega. L'autora destacó especialmente la serie «La familia Castañón», publicada ente 1997 y 2005 nos suplementos de branu de La Nueva España, pero recordó que’l so fíu «fixo munches coses bones más».
El dibuxante Ángel de la Calle, qu’intervieno nel actu, sorrayó’l papel fundamental de Medio na modernización del cómic asturianu: «Hasta Igor, el cómic fechu n'Asturies yera tradicional. Él dio-y modernidá y una voz propia, dende un llugar privilexáu». Pa De la Calle, «nel cómic asturianu hai un enantes y un dempués d'Igor Medio».
Tamién participó l'historietista Javier Rodríguez, amigu y collaborador del artista, quien destacó’l so calter «costumbrista, aplicáu y con una gran capacidá pa facer una llectura social del momentu». Rodríguez recordó emocionáu que, ente les tires de «La familia Castañón», la so favorita ye aquella na qu’Igor reflexó la muerte del so propiu padre al traviés de los personaxes de la serie.
La conceyala de Cultura de Xixón, Montserrat López Moro, agradeció la donación y aseguró que la obra «va tar perfectamente curiada y a disposición de la ciudadanía». Tamién recordó que Sonia Tuya yá apurriera va años una colección de trabayos del so fíu al Colexu Públicu Monteana.
El fondu gráficu d'Igor Medio pasa asina a integrase na colección d'artes gráfiques del Muséu del Pueblu d'Asturies, con obres d'artistes como Alfonso y Isaac del Rivero, ampliando y arriqueciendo’l patrimoniu artísticu asturianu. «Quixisti facer humor, pero fixisti hestoria», resumió la historiadora Arancha Margolles, n’homenaxe a un creador que supo retratar, con tenrura ya ironía, la vida cotidiana y la identidá asturiana.