El llibru entellaza elementos de calter históricu, social y cultural, con anécdotes personales y referencies bibliográfiques que documentean más de tres décades de trayectoria
13 nov 2025 . Actualizado a las 18:37 h.L'Asociación Grana, creada n'alcordanza de la activista xixonesa Yolanda Huergo, vien d'anunciar la obra ganadora de la segunda edición del Premiu Grana d'Ensayu, que recayó nel trabayu ¡Da-yos caña! El tiempu y el contestu d'una banda de Rock Astur, del músicu y investigador Xune Elipe. Esti gallardón, de periodicidá biañal, tien como oxetivu fomentar la investigación en llingua asturiana en cualesquier campu del conocimientu, amosando'l valor del asturianu como ferramienta válida pa la creación académica y cultural.
L'ensayu ganador analiza les circunstancies históriques, sociales y culturales que fixeron posible'l surdimientu de Dixebra en Avilés, y el so papel como banda referencial del rock asturianu. Elipe aborda nel so estudiu acontecimientos clave a nivel mundial y local, como la crisis del petróleu de 1973, la Transición política nel Estáu español, la reconversión industrial, el movimientu asturianista modernu, el nacionalitarismu llibertariu, el movimientu punk o la influencia de la música celta.
Nel últimu apartáu, l'autor dedica un espaciu destacáu a definir la identidá artística de Dixebra, poniendo l'accentu nel so mestizaxe musical, la repercusión pública, la reivindicación llingüística, les rellaciones lliteraries y el obrerismu temáticu que carauteriza les sos lletres. El llibru entellaza elementos de calter históricu, social y cultural, con anécdotes personales y referencies bibliográfiques que documenten más de tres décades de trayectoria.
Elipe espresó'l so agradecimientu pola distinción, afirmando que «ye un honor ganar esti premiu, préstame pola vida, porque sentimentalmente representa muncho pa min, Yolanda foi y sigue siendo un referente pa toles persones que lluchamos por una Asturies y un mundo meyor».
El xuráu, formáu por Inaciu Galán (ganador de la edición anterior), Boni Pérez, Ánxelu G. Morán y Esther Prieto, col periodista Pablo Rodríguez como secretariu, decidió otorgar el premiu por unanimidá. Na acta rescamplóse'l «valir testimonial y l'análisis del contestu cultural, político-ideolóxicu y socioeconómicu nel que surdió una de les formaciones musicales más importantes de les últimes décades n'Asturies».
La entrega del premiu, dotáu con 1.500 euros, va celebrase'l 12 d'avientu a les 18:00 hores nel Muséu Casa Natal de Xovellanos de Xixón, nun actu que se prevé convertir n'un homenaxe tanto a la figura de Huergo como al compromisu cultural col idioma.
Una obra pa divulgar la historia musical d'Asturies
La editorial Trabe va ser la encargada de publicar l'ensayu, que va incluyir material gráficu abondosu, dende cartelos, semeyes y pegatines hasta documentación inédita de la escena musical asturiana. Con esti volume, Elipe suma una nueva aportación a la so llarga trayeutoria como divulgador de la música del país, onde vien cultivando un estilu ente'l estudiu etnográficu y la crónica cultural.
El autor, conocíu tamién pola so actividá artística, ye responsable de títulos como Llingua y rock (1996), Rockmería. Un repasu a la música popular del sieglu XX (2009) o Hai una llinia trazada. Historia de la música asturiana, obra que-y valió'l Premiu Máximo Fuertes Acevedo 2022. Amás, Elipe foi guionista de la serie documental D'ayeri a güei (TPA), sobre la evolución de la música asturiana, director del Anuariu de la Música Asturiana, y coordinador del Archivu de la Música Contemporánea Asturiana (AMCA).
Tamién dirixe'l programa Al Son, de RPA, dedicáu a la música d'espresión asturiana, lo que reforza'l so perfil como una de les voces más conocíes y constantes na defensa del rock y la llingua asturiana. El premiu Grana consolídase asina como un espaciu de prestixu cultural y compromiso llingüísticu, al poner en valor trabayos que contribúin a fortalecer el papel del asturianu nel ámbitu del pensamientu y la investigación.