Vanessa Gutiérrez resalta'l valor d'Artístiques y la so contribución a la promoción del asturianu
AGORA
Artístiques ye un eventu de la marca Puru Remangu pioneru y gratuitu que combina artes escéniques, música y artes plástiques, celébrase esti sábadu 29 de payares nos Kuivi Almacenes d'Uviéu
26 nov 2025 . Actualizado a las 17:52 h.La Conseyera de Cultura, Política Llingüística y Deporte d'Asturies, Vanessa Gutiérrez González, destacó esti miércoles el valor del festival Artístiques que, al so xuiciu, «va suponer un finxu na cultura d'Asturies» y que'l so algame respuende a «munches de les necesidaes que tien el sector», especialmente en materia d'igualdá y d'usu de la llingua asturiana.
Artístiques ye un eventu de la marca Puru Remangu pioneru y gratuitu que combina artes escéniques, música y artes plástiques. Celébrase esti sábadu 29 de payares nos Kuivi Almacenes d'Uviéu. La mayoría de les obres fueron creaes espresamente pal festival y les cerca de 40 artistes participantes son muyeres xóvenes qu'utilicen la llingua del so territoriu como idioma d'espresión.
Gutiérrez defendió la necesidá del festival y el so impactu nel sector cultural: «Tolo que consta esti festival yá por sí mesmo demuestra la necesidá qu'esiste de que se produza», afirmó. La so presencia na presentación respuende, según comentó, al «valor» del proyectu. Sorrayó la importancia de Artístiques pa promover la igualdá de xéneru y la visibilidá de les muyeres na cultura. Según los datos d'un estudiu realizáu pol so departamentu, el 44,3 % de los puestos de trabayu culturales n'Asturies tán ocupaos por muyeres. Según detalló, la representación femenina sigue siendo menor n'ámbitos como los grupos musicales, el sector discográficu o el promotores d'espectáculos. «Eso tamién tien consecuencies de cara a les artistes», señaló.
Artístiques, esti sábadu n' Uviéu
Artístiques entama a les 19.00 hores cola estaya d'Artes Plástiques na que participen les artistes María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero y les estudiantes de la ESAPA (Escuela Superior d'Arte del Principáu d'Asturies) Raquel Mañana y de la Escuela d'Arte d'Uviéu Lucía Álvarez. Hasta les 21.30 hores van tar creando en vivo 10 obres sobre llenzu rellacionaes cola filosofía del festival. N'acabando van presentales énte'l públicu, que si quier va poder mercar ellí estes creaciones úniques.
A les 20 hores ye'l momentu de les Artes Escéniques y l'estrenu de 4 obres creaes pa Artístiques: la de les alumnes de la ESAD Cuando pase l'iviernu, monólogu de Carmen Capellá; y Bañu nel cristal, performance d'Adriana Yáñez, Nora Junquera y Julia Azcano; xunto a les de les profesionales Xana Llaneza, qu'interpreta la pieza de danza contemporánea Materia Vivo, y Paula Mata col monólogu poéticu-escénicu Cadasorbu, cadamosca, cadaherida que me xurgo: d'abducciones, sangre seco y viesca frondosa. Estes cuatro obres tienen pesu y tresfondu. Toquen temes venceyaos a la mocedá, a la salú mental, a los TCA, a la identidá, a la cultura, a la resistencia...
A les 21.30 hores pónse'l ramu al festival con música. Los conciertos entamen cola 1.ª Muestra d'Asturianada Electrónica. Nella les cantadores Alicia Villanueva y Lucía Rojo arrodiáronse de la producción musical de Llevólu'l Sumiciu y Fruela 757 y de les escritores Blanca Fernández, Marina Pangua y Ánxela Gómez d'Ávila pa crear seis pieces inédites que renueven la tonada asturiana con música electrónica y lletres actuales.
La DJ Lidia Friera va ser la encargada de pinchar los temes enriba l'escenariu. Tres d'elles toquen les artistes convidaes de fuera d'Asturies: la gallega Catuxa Salom y la vasca Süne coles sos propuestes que xunten música de raigañu de la so tierra y electrónica. Amás, va haber una sorpresa na que'l tríu de xóvenes pandereteres Rellume tamién van xubir a escena.
Promoción del asturianu
Gutiérrez destacó'l valor del festival pa la política cultural del Principáu y la so contribución a la promoción del asturianu. Na so opinión, Artístiques «traza los caminos a los qu'hai que dir avanzando» pa responder a les necesidaes del sector. Al so xuiciu, el festival «va suponer un finxu na cultura d'Asturies y na sociedá asturiana, y tamién nel sector cultural». «Nun tamos equí solo por amor al arte, sinón tamién porque queremos poder vivir profesionalmente del arte, y que lo faigan les muyeres», añedió, informa Europa Press.