La fecha na qu'empezaron los pagos adelantróse anguaño a ochobre, mes nel que s'abonaron 6 millones de l'ayuda asociada al vacunu de lleche
28 nov 2025 . Actualizado a las 16:26 h.La Conseyería de Mediu Rural y Política Agraria antemanó dende'l mes d'ochobre 34.972.237 euros de pagos de la Política Agraria Común (PAC), lo que supón un aumentu de 3.642.836,03 respectu al mesmu períodu del 2024, cuando se sufragaron 31.329.401,24 euros.
Nesti periodu d'anticipu abonaron les cinco principales llinies directes de la PAC: Ayuda básica a la renta pa la sostenibilidá: 11.955.305 euros que reciben 6.149 esplotaciones. Ayuda complementaria redistributiva: 3.654.269 euros pa 6.136 ganaderíes. Complementu pa mozos: 904.226 euros pa 230 titulares. Ayudes asociaes: 6.948.861 euros pa 4.549 ganaderíes de vacunu de carne y 6.088.171 euros pa 996 esplotaciones de lleche. Ecorreximen de llendo estensivu: 5.421.402 euros pa 5.800 ganaderíes.
Amás, la fecha na qu'empezaron los pagos adelantróse anguaño a ochobre, mes nel que s'abonaron 6 millones de l'ayuda asociada al vacunu de lleche. Na primer selmana de payares pagaron otros siete millones de la llinia asociada al vacunu de carne, lo que demuestra'l bon trabayu de planificación de Mediu Rural pa sufragar enantes les ayudes de mayor importancia pa les ganaderíes, que son aquelles vinculaes a la producción.
El departamentu que lidera Marcelino Marcos prevé ingresar n'avientu'l primer saldu de les ayudes directes -lo que va suponer algamar el 90% del importe unitariu fixáu pol Fondu Español de Garantía Agraria (FEGA) pa cada ganadería-, asina como les de desenvolvimientu rural. Asina, esti vienres pidióse al FEGA l'importe correspondiente a les subvenciones asociaes al vacunu de lleche (2,9 millones) y carne (3,4 millones) pal so pagu la próxima selmana, ente que el restu de sofitos directos va abonase a lo llargo del mes
Al respeuto de les ayudes de desenvolvimientu rural, la más importante -aquella que sofita'l llabor de llabradores y ganaderos qu'operen en zones con llimitaciones significatives, como les árees de monte- pagará la próxima selmana a 3.681 esplotaciones por un importe global de quince millones.
El restu d'estes ayudes de desenvolvimientu rural (producción ecolóxica, caltenimientu de recursos xenéticos, biodiversidá y Rede Natura 2000) va ingresase, nel porcentaxe correspondiente, enantes de fin d'añu pa completales, en tolos casos, enantes del 30 de xunu del 2026, fecha en que termina'l períodu fitu pa los pagos.