La llibrería Matadero Uno acueye'l sábadu 13 l'actu de presentación, con cantares nuevos, collaboraciones y un llibru que repasa la historia de la banda
08 dic 2025 . Actualizado a las 13:45 h.La llibrería Matadero Uno, na Plaza de Riego d’Uviéu, va acoyer esti sábadu 13 d’avientu a partir de les 19.00 hores la presentación del nuevu trabayu de Skama La Rede. La banda asturiana va poner por primer vez a disposición del públicu el discu-llibru «20 años», un proyectu que conmemora les sos dos décades de trayeutoria.
El discu preséntase en formatu vinilu y contién ocho cantares nuevos, onde se recueyen collaboraciones de Pirri (Escuela de Odio), Ramón Blanco (Los Berrones), Daviz Rodríguez (Mala Reputación), Humber (Misiva) y Raquel (Ochobre). Amás del material musical, la publicación inclúi un llibru de más de trenta páxines que repasa la historia del grupu con testos de distintos autores rellacionaos cola escena musical asturiana y estatal, ente ellos David Artime «Roxu», Xune Elipe, Xicu Ariza, Natalia González, Nuno Feliz y Gabri Reigosa. El volume recueye tamién semeyes d’autor, recortes de prensa y materiales documentales que dan cuenta del percorríu creativu del grupu.
El diseñu del conxuntu —vinilu y llibru— ta fechu por Alfonso Zapico d’«A Sangre Estudio Gráfico», ente que les grabaciones realizáronse en «Tutu Estudios», en Corvera, con producción musical de Sergio Rodríguez.
«20 años» conviértese nel quintu discu d’estudiu de Skama La Rede, dempués de «La nuesa hestoria» (2005), «Echaos a la mar» (2007), «Ye too mentira» (2010) y «Avante» (2014). Nesta ocasión, el proyectu dase a conocer de manera autoxestionada pola propia banda.
Dempués de la so presentación en Uviéu nel so formatu físicu, el trabayu va poder descargase en versión dixital a partir del llunes 15 d’avientu a través de les principales plataformes musicales.