El carismáticu cantante vascu dio un recital de 2 hores nel Palaciu de los Deportes de la ciudá dos nueches consecutives
21 dic 2025 . Actualizado a las 10:16 h.Si Fito & Fitipaldis colgó'l cartelu d'entraes escosaes dos vegaes en Xixón yera por dalgo. El cantante vascu (acompañáu de Carlos Raya a la guitarra, Javier Alzola al saxofón, «Boli» Climent al baxu, «Coki» Giménez na batería, Diego Galaz al vigulín y a la guitarra y Jorge Arribas a los teclaos) punxeron a baillar al ritmu de la meyor música a un Palaciu de los Deportes enllenu una segunda nueche, anque esta fecha yera la orixinal de la xira.
Poco dempués de les 20.30 hores, a contraluz, como unu de los cantares del discu nuevu, Fito Cabrales arrancó un recital de dos hores nos que repasó les novedaes del so últimu trabayu ensin escaecer los grandes ésitos de la so carrera dende que dexara Platero y Tú. Tres esi entamu, vino «Un buen castigo», «Me equivocaría otra vez» o «Por la boca vive el pez», que desataron los coros masivos y confirmaron l'estatus de la banda como referente interxeneracional.
Les composiciones del últimu discu, El monte de los aullidos, ocuparon tamién un espaciu destacáu nel setlist, tocando hasta 6 de les 10 que tien esti trabayu. Lloñe de romper el ritmu del conciertu, los nuevos cantares integráronse con naturalidá, amosando una evolución sonora coherente y una banda que caltien intacta la so identidá, recuperando tamién temes vieyos como «Whisky Barato».
El tramu final del conciertu alzó entá más la respuesta del públicu, con temes como «Soldadito marinero» y «La casa por el tejado», que cerraron la nueche ente aplausos enllargaos y un pabellón de pies. Los bises punxeron el broche a una velada que reafitó la vixencia de Fito & Fitipaldis y la so capacidá pa convocar a delles xeneraciones alredor del rock, faciendo alcordanza de la dómina de Platero y Tú, con «Entre dos mares» y zarrando'l so pasu per Xixón con «Antes de que cuente diez». La ciudá enterá aulló al ritmu de Fito & Fitipaldis y yá espera a la xira siguiente.