Salú alministra 262.000 vacunes contra'l gripe y caltien hasta mañana la campaña ensin cita previa
AGORA
Les autoridaes sanitaries recuerden que la vacuna ye la meyor ferramienta pa protexer a la población contra'l virus
22 dic 2025 . Actualizado a las 15:28 h.El Serviciu de Salú del Principáu (Sespa) sigue ampliando la cobertoria frente al gripe per aciu la campaña añal de vacunación, na que participaron hasta agora 262.296 persones. D'elles, 171.472 son mayores de 64 años, lo que supón qu'un 57,27% d'esti sector poblacional, ún de los más espuestos a posibles entueyos cola enfermedá.
Tamién s'alministró la profilaxis a 10.635 neños menores de 5 años, lo que representa un 56,28% del total nesta franxa d'edá. Dientro de los grupos de riesgu o con mayor esposición al virus, tamién se vacunaron 7.793 trabayadores sanitarios, 4.284 embarazaes y 10.044 persones mayores que viven en residencies.
Les autoridaes sanitaries recuerden que la vacuna ye la meyor ferramienta pa protexer a la población contra'l virus. Tamién encamienten l'usu de mázcaros n'espacios zarraos si se perciben síntomes como tos, tusíes y conxestión nasal, asina como en centros sanitarios y sociosanitarios, farmacies y medios de tresporte públicu.
El gripe pue causar entueyos graves, especialmente nel casu de les persones mayores, menores de 6 a 59 meses, enfermos crónicos, persones inmunosuprimies y muyeres embarazaes. Coles mires de siguir ampliando la protección frente al virus, la campaña de vacunación ensin cita peles tardes caltiénse hasta mañana día 23 d'avientu.