Iniciativa pol Asturianu ufre dos modelos de carta a los Reis Magos n'asturianu pa fomentar l'usu del idioma ente la reciella

Iniciativa pol Asturianu pon a disposición de les families y de la comunidá educativa dos modelos de carta a los Reis Magos en llingua asturiana, col envís de que los neños y neñes puedan escribir y unviar los sos regalos usando l’asturianu d’una manera natural y prestosa.

Esta campaña quier averar la llingua propia a la infancia al traviés de la carta a los Reis Magos, favoreciendo l’usu del idioma en contestos cotidianos y reforciando la tresmisión interxeneracional de la llingua. Los modelos tan pensaos pa distintes edaes y niveles de competencia llingüística, facilitando asina que cualquier menor pueda participar, collaborando los sos tutores.

Dende Iniciativa pol Asturianu señalen que «ye fundamental que los neños y neñes puedan vivir l’asturianu como una llingua viva y cercana cola que conviven nel colexu y na familia. Queremos que l’asturianu tea presente tamién nos momentos más especiales, allegres y con más ilusión del añu». Nesti sen, la campaña pretende normalizar l’usu del asturianu nel ámbitu familiar y festivu, más allá del entornu escolar.

Los modelos de carta puen descargase de baldre al traviés del portal web d’Iniciativa pol Asturianu, asina como nes redes sociales de la organización y tán disponibles en formatu PDF pa la so impresión y difusión.

Con esta propuesta, Iniciativa pol Asturianu reafirma’l so compromisu cola promoción social del asturianu y cola creación de materiales que contribuyan a garantizar los derechos llingüísticos de la ciudadanía dende la infancia; asina como complentar les campañes pa estes fiestes de los servicios de normalización llingüística.

---

---